Pisiniarfimmiut bankermiunut unammillerput

Kalaallit Nunaanni Brugsenimi sulisut Grønlandsbankimi sulisunut unammillerput. Pisoriarnerit amerlanerpaat kiilunillu amerlanerpaanik katataqarnissaq unamminermi anguniarneqarpoq.
Allattoq Louise M. Kleemann
marsip 01-at 2011 07:12

Sukkornerup diabeteseqarnerup paasissutissiissutigineqarnissaanik Nuummi suliniaqatigiiffik (Diabetesgruppen) suleqatigalugu unammineq piareersarneqartoq KNB-mi HR-chef Carsten Olsen oqarpoq.

Peqataasut ullumi marsip aallaqqaataani allartitsinnatik tamarmik aaverneqarput. Unammeqatigiinnermi qaammatini pingasuni ssivisussusilimmi suliniaqatigiiffik diabetesgruppi siunnersuisuussaaq.

Suliffeqarfiit taakku marluk erseqqissarpaat, nunatsinni kukkusumik nerisaqarnikkut uninngavallaarnikkullu nappaateqalertarneq pakkersimaarniarlugu unammillernermi anguniarneqartoq.

Aningaaserivimmi sulisunut pisortap Patricia Lund Olsenip suleqatimi akornanni peqataasussarsiornera ajornarsimanngilaq.

- Sulisut peqataarusupput. Nuannersutullu isigaat, suleqatillu akornanni kina oqilinerpaassanersoq unammissutigilereerlugu, Patricia Lund Olsen oqarpoq.

KNB Grønlandsbankilu unammillernermi tamarmik immikkut 20-inik oqilerusuttunik pisunnerulerusuttunillu peqataasoqarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq