Pisiffiup siorna sinneqartoorutini aningaasaliissutigai
Ukiumut kaaviiaartitat 877 mio. kr.-iupput. Pisortaanerup Per Steen Larsenip pingaartumik sulisut naammassisaqarluarsimanerat nioqqutissanillu akikitsunik tuniniaaneq tikkuarpai.
Pikkorissunik sulisorpassuaqarpugut ullut tamarluinnaasa ilungersorlutik pisisartutsinnik naammagisimaarinnilersitsiniartunik, aammalu nioqqutissaativut akikitsut discount-inik taaneqartartut assorsuaq sammivavut, Per Steen Larsen oqarpoq.
Suliffeqarfissuaq 2009-mi agguaqatigiissillugu 484-inik sulisoqarpoq, tamatumanilu ukiup siulianut naleqqiullugu sulisut arfineq-pingasut ikileriaataallutik. Sulisut iluamik ingerlanissaat assorsuaq sammivarput, suliniutit amerlasuut aallartippavut sulisut tamarmik Pisiffimmut suliartoraangamik nuannerninngortissinnaasaat.
Pisiffik illoqarfinni annerpaani 30-nik pisiniarfeqarpoq. Ukiumi naatsorsuuteqarfiusumi 2009-mi aningaasatigut kaaviiaartitat 876,8 mio. kr.-iupput, tamannalu qaammatisiutit malillugit ukiumut 2008-mut naleqqiullugu 35,8 mio. kr.-inik amerleriaateqarfiulluni.
Aktiaatillit ippassaq ataatsimeersuarput, naatsorsuutit akuersissutigalugit naammagisimaarinninnertillu oqaatigalugu. Piginnittut iluanaaruteqanngillat. Sinneqartoorutit tamatumunnga taarsiullugu aningaasaliissutinut atorneqarput.
Per Steen Larsen ima oqarpoq:
- Ukioq 2010-mi Maniitsumiippugut pisiniarfissarput inaariartorlugu, taavalu Sisimiuni pisiniarfimmi aningaasat atorpavut, neriuutigaarpullu illoqarfitta kujallersaanni Qaqortumi aallartissasugut, taqqavanimi aamma pisiniarfik nutaaliaalluinnartoq sananeqassammat.
Danmarkimi nerisassaarniarfissuaq Dagrofa Pisiffimmi aktiat 72 procentiinik, Namminersorlutik Oqartussat pigisaat Greenland Venture 27,5 procentinik piginnittuupput kiisalu sulisut ikinnerusunik aktiaateqarlutik.
