Pisiffik aamma Brugsen juulliliivissoq tunisaqarluarsimaqaat

Sinerissami pisiniarfinnik ingerlatsisut annerit marluk, Brugsen aamma Pisiffik juullimut atatillugu tunisaqarluarsimaqaat. Tassami pisiniarfiit taakku marluk juullikkunni tunisatigut rekordiliisimapput. Brugsenip pisortaata Olav Thomsenip rekordiliillutik tunisaqarnertik iluarisimaarluinnarpaa:

- Ajunngitsorujussuarmik ingerlavugut, kaaviiaartitavut aatsaat taama amerlatigipput. Ullormut, sapaatip akunneranut ukiumullu tunisanik rekordiliivugut tamannalu naammagisimaarluinnarparput.

Nuannaarutigeqaarput pisiniartartorpassuit uatsinni katersuuffeqarmata. Tamanna uatsinnut sulisutsinnullu pingaaruteqaqaaq, taamaalillutami tunisartakkatta iluarisimaarneqarnerat takusinnaagatsigu.

Maluginiarparput nioqqutissanik assigiinngitsunik niuerneq ingerlalluartoq, tassa inuit pisiniarluartorujussuupput aamma nioqqutissanik akisugaluartunik pisiniartoqarluarpoq.

Aamma nerisassaanngitsut nerisassallu assigiimmik tunisaqarluarfigaavut, Olav Thomsen oqarpoq.

Brugsenip unammillertaani Pisiffimmi pisortap Carsten Lynghøjip tunisatik ima oqaatigai:

- Ukiormanna juullimut atatillugu niuerluartorujussuuvugut, oqarsinnaavugut juullimut niuernitsinni ukiormanna rekordiliilluta.

Aamma oqarsinnaavugut namminersortunngorsarneqarnitsinniit ukiut kingulliit tallimat ingerlaneranni juullimut atatillugu aatsaat taama tunisaqartigaluta.

- Malunnarpoq inuit aningaasaateqarnerulersimasut. Tassa nioqqutissanik akisugaluartunik nerisassaanngitsunillu tunisaqarluarpugut aamma nioqqutissanik pitsaasunik nuannarineqartunik mærkevarenik taaneqartartunik tunisaqarluarpugut, Pisiffiup pisortaa Carsten Lynghøj taama oqarpoq.