Inatsisissatut siunnersuut: Pisassiissutit tuneriarlugit tigoqqileraat

Aalisarneq pillugu inatsisissatut siunnersuut ilaatigut aavataasiortut rajartassaat ilanngarlugit sineriammut qanittumik raajanik iluaquteqartut amerlanerulernissaat siunertaqarpoq. 

Sinerissamullu qanittuni aalisartoq raajarnialersinnaanermik neriulertoq, raajartassaminik ilanngaanneqarsinnaasoq, tamatuma piginneqatigiiffinnut akisunissaannik aarleqquteqarpoq.

Tunisassiorfinni suliassaaleqisoqaleratarsinnaasoq

- Allannguingaatsiassaaq tamannalu suliffeqarfinnut inuiaqatigiinnullu akisussaqaaq, Polar Seafoodimi siulersuisuni siulittaasoq Henrik Leth oqarpoq.

Taanna naapertorlugu, Polar Seafoodip avataasiorluni pisassiissutisiani nunami tunisassiorfinni suliassaqarneq qulakkeerumallugu namminerminnut allanulluunniit sinerissap qanittuani aalisagartassatut tunisaraa.

Inatsillu atuutilerpat Polar Seafoodip tunisassiorfippassui suliassakillissasut, siulittaasup ernumassutigaa. 

Aalisariutaatillit periarfissinneqartut

Naalakkersuisulli siunniussaat sinerissap qanittuani aalisariutaatilimmit ilassilluarneqarpoq.

- Periarfissaqalissuugut raajarniarsinnaanngornissatsinnut, sinerissap qanittuani aalisariutaatilik, Nuka John Olsen, oqarpoq. 

Taanna maanna raajarniartuunngilaq, inatsilli allanngussappat, aalisartut allat peqatigalugit isaatitsilluaataasunik aalisarsinnaalissaaq.

- Arlallit uattulli aamma utaqqiinnarput taamatut periarfissinneqarnissaminnik, Nuka John Olsen, oqarpoq.

Naalakkersuisut allannguiniarnerminni amerlanerusut pissarsiaqarnissaat anguniarpaat. Tamannalumi naapertuilluartuusutut oqaatigineqarpat, Polar Seafoodimiit isumaqatigisinnaavaat. 

AAMMA ATUARUK Politikkikkut siunertarineqartoq aningaasanit pingaarnerusoq

AAMMA ATUARUK Inatsisissatut siunnersuut nangiarnarpallaarpoq

Kisianni ukiut 27-it matuma siornatigut raajartassanik agguaanermi amerlasuut pissaqarnissaat qulakkeerniarneqartoq, siulittasup eqqaasitsissutigaa. Aammali taamani pisassallit amerlasuut pisassaminnik tunisisimanerat eqqaasitsissutigaa. 

- Pisassiissutisiatik uagutsinnut tuneriarlugit tigoqqinnialerpaat, tamannalu paasisinnaanngilarput. Tunisat tigoqqiinnarneqarsinnaanngillat, taakkuppullumi inatsimmi allannguinikkut ajunngitsorsitinniarneqartut, Henrik Leth oqarpoq.

Aalisarnermut inatsisissatut siunnersuut soqutigisaqartut peqatigalugit sukumiisumik misissoqqullugu, taanna Naalakkersuisunut kaammattuuteqarpoq.