Pisassiissutit ataasiakkaat umiatsiararsortunut
Finn Karlsenip taarsiullugu umiatsiaararsorlutik qaleralinniartut, qaleralinniat 6 meterit sinnerlugit angallataatillit assigalugit, immikkut pisassaqartinneqalernissaat atuutsilerusuppaa.
- Isumaqatigiissuteqarfiginerpaasarput angalaninni, aalisartullu umiatsiaararsortullu, aamma angallatersortut oqaaseqartut tapersersorpaat isumaq; Pisassinneqassapput angallatitulli umiatsiaaqqat, Finn Karlsen, aalisarnermut, piniarnermut nunalerinermullu naalakkersuisoq oqarpoq.
Taanna Ilulissani, Uummannami Upernavimmilu aalisarnermik aallutaqartunik naapitsisareerluni Nuummut uteqqammerpoq:
- Umiatsiaararsorluni aalisarneq, qaleralinniarneq aqutsiveqarfinni pingasuni paggatassiineq, taanna uanga iluarinngilara taamatut ingerlaneq. Taamaammat allanngortariaqarpoq tassani. Uagut pisortatut pisuulluta inuit aalisartippagut ulapiterujussuarlugit aalisartut. Ullorpassuit sininngitsoortarput nungunnissaasa tungaannut. Taanna akuerineqarsinnaanngilaq. Taamatut aalisartitsisinnaanngilagut, Finn Karlsen oqarpoq.
Taamaattumik Finn Karlsenip umiatsiaararsorlutik qaleralinniartut immikkut pisassinneqartalersinnaanerat suliniutiginiarpaa.
Taassuma ernummatiginngilaa immikkut pisassiisalernerup kinguneranik umiatsiaararsorlutik qaleralinniartut ikileriapiloorsinnaaneri. Pisasseeriaasermi allatut piumasaqaatitaqartikkusuppaa.
- Taamaammanuna uanga taanna akerlerinikorujussuungaluariga Naalakkersuisut siulitta pilersinniagaat qaleralinniarnermut aaqqissuusseqqinnermi raajarniarnermi periaaseq assigiinnarlugu pilersitsineq. Tassani tunngavigivarput ikittuaranngoriasaarsinnaanerat namminersorlutik aalisartut, Finn Karlsen oqarpoq, nangillunilu:
- Uanga pitsaanerpaatikkaluarpara pisassat pigisat, pigisatut naleqalernikut, utertinneqarsinnaasariaqarput allamut tuninagit. Maannakkullu inatsit taanna inatsisaagami piuminaatsupilussuuvoq allanngortinnissaa. Kisianni allanngortitsisinnaagutta periarfissiisariaqarpugut. Siullermik immaqa oqarsinnaasariaqarpugut selskabit pisiortornerat unitsinneqartariaqarpoq. Taanna sukkasuumik aaqqinneqarsinnaavoq, Finn Karlsen, umiatsiaararsorlutik qaleralinnianut aappaagumiit immikkut pisassiisalersinnaanissamut neriuuteqartoq, oqarpoq.