Pisassiissutit amerlineqassanngillat
Mads Ole Kristiansenip aarrimik ataatsimik pisassiissut qangali atoreerpaa.
- Pisassiissut aarrinut sisamanut-tallimanut qaffanneqartuuppat piniartut immap angallaviginnerani nerukkaatissanik pilisinnaalissagaluarput Mads Ole Kristiansen isumaqarpoq.
- niartut pisassiissummik suli atuinngitsut silap allanngorarneranik peqquteqartumik aallarsinnaanngillat, taamattumik siunissaq eqqarsaatigalugu pisassiissutinik qaffaanissaq siunnersuutigaarput, ajornartorsiummi aappagu aamma atuuttussaavoq, Mads Ole Kristiansen oqarpoq.
Ukiumut piniagassat suli sinneqarmata ilanissaannik tunngavissaqanngitsoq piniarnermut naalakkersuisoq Ane Hansen KNR-imut ippassaq ualikkut oqarpoq. Aamma qimminik kaattunik ajornartorsiuteqarneq nalinginnaasuunngitsoq Ane Hansenip oqaatigaa.
- Ajornartorsiut ukiut tamaasa takkuttarpoq, taamaammat pilinissaq pisariaqartarpoq, tusakkakkalu malillugit piniartut ataasiakkaat kisimik taamatut ajornartorsiorput, Ane Hansen oqarpoq.
Mads Ole Kristiansen naapertorlugu piniartut anginernik umiatsiallit kisimik siku akimorlugu ullumikkut nerukkaatissaminnik piniariarlutik aallarsinnaapput.
- Piniartut mikinernik umiatsiallit sissamiit isiginnaaginnartarioaqarput pisassiissuteqaraluarunilluunniit, Mads Ole Kristiansen oqarpoq.
Qaanaami piniartut aguaat inatsisartuni illuatungiliuttunit aamma sakkortuumik qisuariarfigineqarpoq.
Naalakkersuisut siulittaasuat akuliuttariaqalersoq Siumup sioulittaasia Aleqa Hammiond isumaqarpoq:
- Inuiaat Kalaallit ajutoorluinnarnissaat utaqqinagu naakkittarnerusumik aammalu inuiaqatigiit oqariartuutaannut tusaanerusumik iliuseqartoqartariaqarnera Naalakkersuisut siulittaasuannut matumuuna apuupparput aaqqiissutissamillu tamarmik inooqataaffigisinnaasaat aammalu akisussaaqatigiissutigisinnaasaat nassaaritsiillugu suleqqullugu. Inuiaat aammalu pisuussutivut pillugit, Aleqa Hammond oqarpoq.