Pisassiisoqaqqinnginnera Kujataani pakatsissutigineqaqaaq

Inuussutissanik suliffeqarfiup, Narsaq Seafoodip, kommune peqatigalugu, ukiup sinneranut 150 tonsinik pilertortumik immikkut assagiarsuttassinneqarnissaq qinnuteqaatigigaluarpaat, aamma Narsamiit Qaqortumiillu aalisartut avannarpasinnerusumi, tassa Nuup Paamiullu avataanni, assagiarsunniarniarsinnaanissaat ilanngullugu qinnuteqaatigigaluarlugu.

Narsaq Seafood Kujataani inuussutissarsiornermik iluatsitsilluartuusoq, fabrikkilu aqqaneq-marluk missaannik Narsami fabrikkimi sulisoqartoq, borgmesterip Simon Simonsenip erseqqissaatigaa.

Taamaammat assagiarsuttassanik qaffaanissamut itigartitsineq borgmesterip uggoraa. Pingaartumik nunatsinni assagiarsuttassat tamakkerneqarnavianngitsut ilimanarsereermat.

- Narsami assagiarsuit pitsaalluinnartuupput, nunarsuarmilu tamanit nersualaarneqarlutik. Inuussutissarsiornermik suliniut Naalakkersuisut sooruna aamma tapersersunngikkaat, inuussutissarsiut avammut tuniniaanermit isertitaqarfiusoq, borgmesteri aperaaq.

Simon Simonsen inuussutissarsiornermut suliffeqarnermullu ataatsimiititaliap siulittaasuanit, Kalistat Lundimit, tapersersorneqarpoq. Itigartitsineq Kalistat Lundip, pakatsissutigaa, tassami suliniutissanik Naalakkersuisut ujartuiarput, inuussutissarsiorneq taamaalilluta ineriartortilerniassagatsigu.

- Naalakkersuisut Kujataani ilumoorlutik ineriartortitserusunnersut qularutigisorujussuanngorparput, Kalistat Lund naggasiivoq.