Pisasseeqqittoqassanngilaq
Naalakkersuisut Qaasuitsup kommunealu maanna eqqartueqatigiipput avannaani aalisartut ukiup sinneranut qanoq isertitaqarsinnaanersut qaleralittassiissutit ilanngikkaluarlugit.
- Siornatigut nalunaarutigereernikuuarput pisasseeqqinnissaq ilimagineqarsinnaanngitsoq tamannalu aalajangiusimavarput, taama aalisarnermut naalakkersuisoq Ane Hansen Qanoruumut oqarpoq.
Uummannap Upernaviullu eqqaanni qaleralittassat nungunneqareerput aalisartullu pisasseeqqittoqarnissaanik noqqaassuteqaraluarput.
- Kisianni tassa pisasseeqqinnissaq illersorneqarsinnaanngilaq. Taamaasiussagutta immitsinnut aaginnartussaavugut, taama Ane Hansen oqarpoq.
- Uagut kisitta piumasaqaatit tamakku aalajangersugarinngilagut. Kisianni tassa nunarsuarmi niuerfiit piumasaraat aalisakkat tunisassiarineqartut nungusaataanngitsumik pisarineqarsimassasut, taama Ane Hansen oqarpoq.
MSC-mik taaneqartartumik meqqimik pissarsissagaanni nungusaataanngitsumik aalisakkat pisarineqarsimassasut. Aalisakkat MSC-mik meqqeqanngitsut maanna Sverige-mut eqquteqqusaajunnaareerput nunallu allat piumasaqaatiminnik sukaterinissamut piareersarput.
- Aalisagaq ataasinnguarluunniit nunatsinni MSC-mik meqqilerneqarsinnaanngilaq. Tamatumunngalu pissutaavoq pisasseeqqittarneq ileqquusimammat, taama Ane Hansen oqarpoq.
Maanna naalakkersuisut Qaasuitsullu kommuneata oqaluuseraat ukiup sinneranut aalisartut suliassaqartinnissaat. Eqqaanartut ilagaat aalisaataarsiutinik saliinikkut isertitaqartoqarsinnaasoq.