Pisassarititanik innersuussinermi eqqoriaasinnaanngorput

Qilalukkat qaqortat qernertallu pillugit Canadap Kalaallit Nunaatalu ataatsimiititaliaat, JCNB, pisassarititanik innersuussisinnaanngorpoq, qilalukkallu amerlassusaat pillugit ukioq 2014 tikillugu eqqoriaasinnaanngorluni.
Allattoq Mads Lynge
juunip 02-at 2009 08:32

Pisassarititanik innersuussinerit piviusunngorput qilalukkat amerlassusaannik 2006-imi 2007-imilu kisitsisoqarnerata kingorna. Kisitsisit takutippaat qilalukkat qaqortat qernertallu amerlangaatsiartut.

Qilalukkanik pisassiinerit kingunerisaanik qilalukkat pisarineqartartut ikiliartorput, kisitseriaatsilli takutippaat qilalukkat qaqortat ikiliartorsimariarlutik maanna amerliartoqqilersut.

Qilalukkat qernertat amerliartornersut nalunarallarpoq.

Siunnersuinermi toqqammavigineqarpoq qilalukkat amerliartornissaasa, ilimanassusaat 50 procentit 95 procentillu akornanni inissisimassasut.

Qilalukkat qaqortat 310-t qernertallu aamma 310-t kitaani ukiumut pisarineqarsinnaassapput, qilalukkallu qernertat 85-it Tunumi pisarineqartarsinnaassallutik.

Ataatsimiititaliaq Nuummi sapaatip-akunnerup naanerani ataatsimiippoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq