Pipaluk Lynge Inatsisartunut uterpoq: Silap pissusaa qaaqqusivoq
- Inersuarmi oqallinnermut peqataanissannut piumassuseqarsimavunga.
Pipaluk Lynge (IA), sulinngiffeqarnerminik kipititseqqammersoq Inatsisartunullu utertoq taama oqarpoq.
Taanna malillugu oqaaseqartartut inississalluni oqaatigivaa:
- Misigisimavunga innuttaasut avatangiiseq silallu pissusaa assut anersaaqarfigigaat – immaqa ilimagisatsinniit annerusumik – inersuarmilu amigaataasutut misigisimaffigigakku, oqarpoq nangillunilu:
- Silap pissusaanut ilungersuuteqarnerusariaqarpugut, iliuusissaqartariaqarlutalu, innuttaasullu Inatsisartuni sullittariaqarlutigit.
Politikki suliffiuvoq oqimaatsoq
Pipaluk Lynge 64-init qinerneqarluni Inatsisartunut 2021-mi qinigaavoq, kingornalu Eqqissisimatitsinermut Avatangiisinullu Ataatsimiititaliami siulittaasutut ingilluni.
Augustimili 2022-imi sulinngiffeqarnissaminik qinnuteqarpoq Inatsisartullu qimallugit Verdensnaturfondimi WWF-imi suliniutinut aqutsisutut sulilerluni.
- Silap pissusaa tamakkiisumik sulissutigilissavara. Nukikka tassunga atorusuppakka, KNR-imut taamani oqarpoq.
Taamaalilluni politikeritut sorsuuttarnerit nukinnik atuiffigerusukkunnaarpai:
- Polikeriuniaraanni ninngusuujusariaqarpoq. Oqaatsitigut inuttullu attaveqaatini saassutsinnerit tingusinnaasariaqarput. Inatsisartuni naalakkersuisunilu issiasut tamaasa nasaarfigaakka. Sakkortoqaaq, oqarpoq.
Nakuunerulerluni uteqqippoq
Massakkut Pipaluk Lynge Inatsisartunut uteqqinnissaminut piareerluni misigisimavoq.
- Ukiumi tassani sulinngiffeqarnerma inuttut inerikkiartornissannik ikiorsimavaanga inuttullu nakuunerulersimavunga, Pipaluk Lynge oqarpoq.
Aammattaaq saassutsinnissanut aggersunut piareersimanerulluni misigisimavoq.
- Nalunngilara sumunngalerlunga. Sakkortuvoq oqallinnerillu sakkortusinnaallutillu inummut tunngasinnaasarput, misigisimavungali maannakkut nukeqarluarlunga.
Tamatumuunakkut qanoq sivisutigissanersoq allannguuteqassanersorluunniit naluaa.
Siunissarmi eqqoriarnianngilaa:
- Eqqoriarsinnaasarpulli tassaavoq silap pissusaa avatangiisillu massakkut sorsuutiginngikkutsigit qanoq ikkumaarnerut. Taannatuaq maannakkut eqqoriarusuppara sorsuutigerusullugulu, Pipaluk Lynge oqarpoq.