PIP-kkormiut ingerlatitseqqiinissartik nalilersussavaat
Nanortallip Kommunia niviarsiaqqamik inuusuttumik, imminornissamut eqqarsaateqartumut, inatsisinik sanioqqutsilluni sumiginnaasimasoq Nunatta Eqqartuussiviani aalajangerneqarmat, Perorsaasut Ilinniarsimasut Peqatigiiffimmiut nuannaaqaat.
- Isumaginninninerup pitsaassusissaa paasivarput, PIP-ip siulittaasuata tullia Sten Pedersen oqarpoq. Kommune Naalagaaffiit Peqatigiit meeqqat pillugit aalajangersagaannik unioqqutitsisimanngitsoq Nunatta Eqqartuussivia aalajangerpoq, tamannalu suliassanngorteqqissanerlugu, PIP-ip siulersuisuuneri piffissami qaninnermi isummissapput.
- Aalajangerneq nuannaarutigeqaarput. Isumaginninninerup pitsaassusissaa inissinneqarpoq, PIP-llu tanamma peqataaffigaa. Uagut isumaqatigineqarnissarput ilimagereerparput, aammami KANUKOKA-p PIP isumaqatigalugu, sapaatit akunneri pingasut qaangiuttut oqaaseqarput, Sten Pedersen oqarpoq.
Taanna oqarpoq, niviarsiaqqap arnaatut misigisaqarsimasut sapinngisamik amerlasuut iliuuseqaqqullugit.
- Meeqqavut pisortanit ilumoorunneqanngikkaangata tunniutiinnartassanngilagut, perorsaasut siulittaasuata tullia oqarpoq.
Taassuma aamma ilimagaa, eqaartuussivimmi aalajangerneq ilaasortaminnut iluaqutaassaaq.
- Meeqqanik ajornartorsiortunik naammattuuigaangamik kommunimut saaffiginnittarput, kisianni kommunimiit susoqanngikkaangat pakatsisimaartarput. Maannalu kommunit iliuuseqartarnissaannik eqqartuussummik takusassaqalerpugut, kommunillu iliuuseqanngikkaangata, ilaasortavut imminnut tatigalutit qisuariarsinnaalerput, Steen Pedersen oqarpoq.
Nanortallip Kommunia Naalagaaffiit Peqatigiit meeqqat pillugit aalajangersagaannik unioqqutitsisimanngitsoq Nunatta Eqqartuussivia aalajangerpoq. PIP-ip siulittaasuata tulliata tamanna isumaqatiginngilaa, siulersuisuunerillu piffissami qaninnermi ataatsimiippata qanoq iliortoqassanersoq isummerfigineqassaaq.
Nanortallip Kommuniani borgmesteriugallartoq, Debora Kleist Inuit Ataqatigiit, maannakkut oqaaseqarsinnaanngikkallarnearpoq, eqqartuussutip inernera kommunimit suli tiguneqanngimmat.
