PIP ilaasortami atorfininnissaanik inerteqquteqarsinnaalissaaq

Perorsaasut Ilinniarsimasut Peqatigiiffiata PIP-p sapaatip-akunnerata kingulliup naanerani ataatsimiinnerani aalajangersakkat ilagaat, namminersortut ingerlataanni paaqqinnittarfinni aamma ulloq unnuarlu angerlarsimaffinni, PIP-mut akissarsianik isumaqatigiissuteqanngitsuni, PIP ilaasortami atorfininnissaanik inerteqquteqartalissasoq. Privatit isumaqatigiissuteqarfiginngisaminni ilaasortaminnik taamaalillugit mattullugit. PIP-p siulittaasortaava Kaaliina Skifte aperaarput sooq taamaaliorniarnersut:

- Privatini ulloq unnuarlu angerlarsimaffiit PIP-lu isumaqatigiissummik sanasussaapput, pinngitsoorani tamanna pisussaavoq, taavalu imaaliortoqartarami isumaqatigiissummik sanajumanngitsut. Isumaqatigiissummik sananissarput piniassammat atorfinnik mattussisinnaatitaanermut pisinnaagatta, tunngaviusumik isumaqatigiissuterput tunngavigalugu, Kaaliina Skifte oqarpoq.

Ilisimatitsissutigaa assersuutigalugu Nuummi meeqqanut angerlarsimaffik namminersortut ingerlataat aamma Ulluunerani paaqqinnittarfik Mælkebøtten maanna isumaqatigiinniarfigineqarmata.