PIP: Aningaasanut inatsit ajornartorsiuterpassuarnut naapertuutinngilaq
- Aperisoqarsinnaavoq, sooruna Nunatsinni ukiut tamaasa kaattoqartartoq? Inatsimmi arlaatigut aaqqitassaqarpa imaluunniit arlaatigut politikimik kukkusumik ingerlasoqarpa, Kaaliina Skifte aperivoq?
Pitsaaliuinerup iluamik aningaasaliiffigineqarnissaa pingaartorujussuartut taassuma isigaa.
- Pitsaaliuineq eqqarsaatigalugu Namminersornerullutik Oqartussat KANUKOKA-lu erseqqissumik isumaqatigiissutigisariaqarpaat, kia sorpiaat aningaasaliiffigisassagai. Taamaalilluni aamma nalorniunnaarlutik utaqqisaqattaakkunnaassapput, PIP-ip siulittaasua oqarpoq.
- Aamma ullumikkut tulluanngitsunik meeraaqqeriveqarluni, meeqqeriveqarluni aamma fritidshjemmeqarpoq. Taamaammat nutaanik sanaartornissaq amigaatigineqarpoq. Maniitsoq assersuutigiinnaraanni, tassani meeqqerivinnik nutaanik pilersitsisoqartariaqaraluartoq, PIP-p siulittaasua, Kaaliina Skifte, oqarpoq.