Pinngortitaq takusaqarfigissallugu soqutiginarnerutippaat

Takornariaqaranermut misissueriaaseq nutaaq atorlugu Kalaallit Nunaanni naatsorsueqqissaartarfiup Air Greenland A/S Mittarfeqarfiit suleqatigalugit misissuineq ukioq 2006-mut 2007-mullu tunngasuni suliarisimasaanni nunatsinni pinngortitaq soqutiginarnerpaatut misigisaqarfigineqartartoq erserpoq. Takornariat 10.000-it missaanniittut apeqqutinik 1-miit 5-mut naliliiffissaminnik akisiffissanik tunineqartarsimasut akissutersimapput, misissuinermilu 3,7-mik inerneqartup takutippaa pinngortitaq nuannernerpaatut misigisaqarfigisisarsimagaat, Kalaallit Nunaanni naatsorsueqqissaartarfik allappoq.

Aamma takornariat takuniagassanut tammajuitsussanullu aniningaasat agguaqatigiissillugu atortagaat 2.500 koruuninut missingersorneqarsimapput, agguaqatigiissillugulu ullut qulit missaanni nunatsinniittartut naatsorsorneqarmat – ullormut inuk ataaseq 250,00 koruuninik aningaasartuuteqartarsimasutut missingersorneqarpoq. Takornariat aamma siunissami nunatsinnut takornariaqqinnissaminnut kissaateqarnerminni sinerissami sumiiffinni allani ornitassanik aamma takunnikkusupput, periarfissatullu nutaatut aallaarsimaartarnissat soqutiginartutut akissuteqarsimasut, Kalaallit Nunaanni naatsorsueqqissaartarfik allappoq.