Pinngortitaq pillugu nunarsuarmi suliniummut nunaqarfik peqataalersoq
Pinngortitamut eqqakkat katillugit 8.500 tonsit inunnit 17.8 millioninit nunanillu 157-ineersunit pinngortitami eqqakkanik nunarsuaq tamakkerlugu katersinermut suliniummi, World Cleanup Day-imi, siorna ullormi ataatsimi peqataanerminni katersorpaat.
Pinngortitamut eqqakkanik katersisarnermut suliniut, Estlandimit aallaaveqartoq, 2008-milu aallartinneqaqqaarami inunnit 50.000-init peqataaffigineqartoq, taamalilluni nunarsuarmi qeqertat annersaannut maanna annguppoq.
Atuartut angalanerannit isumassarsiaasoq
Nunaqarfimmimi Niaqornaarsummi, 259-nik inuttaqartumi, suliniut ukioq manna peqataaffigineqassasoq aalajangiunneqarpoq, tamannalu nunaqarfimmi atuartut anginerit piujuaannartitsinissaq pillugu suliniummut Nunani Avannarlerni peqataareernerannit aallaaveqarpoq.
- Ullormi tassani suliffeqarfiit innuttaasullu peqatigiillutik saleeqatigiinneq ingerlattussaavaat. Taanna atuarfimminngaanniit ataqatigiissarparput aaqqissuussaralugu, Julius Jeremiassen, Atuarfik Kristian Lundbladimi pisortaq oqarpoq.
World Cleanup Day-imi peqataasut
Atuarfik Kristian Lundbladimimi atuartut anginerit 15-it Estlandimut aamma Savalimmiunut Nunani Avannarlerni piujuaannartitsinissaq pillugu suliniummut peqataanerminnut atatillugu angalapput. Siornalu atuartut Estlandiminnerminni pinngortitami eqqakkanik nunarsuaq tamakkerlugu katersinermut suliniummi, World Cleanup Day-imi, peqataapput.
- Taamaalillutalu tassa una World Cleanup Day angalanitsinni peqataaffiginikuullugu. Taamaalilluta massakkut Niaqornaarsummit aallaavilimmit aallartittussanngorlutigu, Julius Jeremiassen oqarpoq.
Nunatsinni tamarmi peqataasoqarnissaa kaammattuutigigaat
Piffissamilu kingullermi pinngortitami eqqakkat oqallisaaneranni Julius Jeremiassen isumaqarpoq suliniut nunatsinnit tamarmit peqataaffigineqartariaqartoq. Atuartummi aamma Niaqornaarsummi atuarfik suliniummut peqataaffigisaminnut nalilersuinerminni aamma pinngortitami eqqakkat annikillisarneqartariaqarnerat inerniliussimavaat.
- Isumaqarpunga piffissaq kingulleq facebookikkut takkussaallattaartut pinngortitamut maangaannaq eqqangarpassuit takutikkaat nunatsinni tamarmi pisariaqartoq una suliniut eqqunneqassappat, Julius Jeremiassen oqarpoq.
