Pinngortitaq paarerusuppaat
Nunatsinni eqqagassat ajornartorsiutaajuarput. Puiaasat seqummakut, eqqaaviit ulikkaartooqqasut, plastikkit eqqagassallu allat illoqarfinni qaqqanilu igiinnakkat qimaannakkallu ajornartorsiuterujussuupput.
Ileqqorineqartorli allanngulerpoq.
Ilulissat Kommuneani pinngortitamut siunnersortip Naja Habermann-ip malugisinnaavaa, mingutsitsisunik qatsussisimasunik iliuuseqarusuttunillu saaffigineqarnerusalernini.
Illinernik eqqiluitsuutitsiniarluni suliniarneq, upernaaq ingerlanneqarpoq, tamannalu kinguneqartitsilluarpoq, ilaatigut illerngit naanerini eqqaavissanik ilisisoqarneranik kinguneqarluni, qimmiliviillu akornanni, illoqarfiullu iluani aamma eqqaavinnik ilioraasoqarsimalluni.
Saaffiginnissutaasut kingulliit ilaagaat, Ilulissani umiarsualiviup salitassaanerujussua. Taannalu Ilulissat kommuneat suleqatigalugu suliassanut tullinnguuttoq, pinngortitaq pillugu siunnersuisartoq Naja Habermann oqarpoq. Eqqagassanut tunngatillugu paasisitsiniaasarneq suliarineqaraangat suleriaatsit allaanerulaartut atorlugit Naja Habermann sulisarpoq, ilatigut sermersuup tungaanut pisuttuartitsinerit atorlugit suliniartarpoq. Soorlu illoqarfimmi inuusuttut ilinniarfiini sulisarnermini suleriaaseq taanna atortarpaa.
