Pinngortitamik nuannarinnittoq akissarsitinneqarpoq
Akissarsiaq 25.000 koruuninik aningaasartaqartoq qulequtaqarpoq ”Pinngortitaq Avatangiisillu Igitaqarfiunngitsut”.
- Peter Davidsenip sulinermini sunngiffimminilu pinngortitamik paarasilluarnissaq ilinniartitsissutigisarpaa. Atuarfimmi ilinniartitsisutut sulinermini meeqqallu aasaanerani aallaarsimaaraangamik eqqagassat ikuallassinnaasut ikuallassinnaanngitsullu immikkoortiternissaat isumagisarpaa, ikuallassinnaasut ikuallallugit, ikuallassinnaanngitsullu Nuummut oqquttarlugit, Pinngortitamut Avatangiisinullu Naalakkersuisoq Anthon Frederiksen akissarsisitsinermut taama tunngavilersuivoq.
Immikkoortumi ”Nukik Piujuaannartoq”-mi Peter Pars A/S Ilulissaneersoq, decemberip pingajuani akissarsitinneqarpoq. Immikkoortumilu “Nungusaataanngitsumik Atuineq”-mi akissarsitinneqartussaq kingusinnerusukkut kalerriutigineqassasoq, Namminersorlutik Oqartussat ilisimatitsipput.
