Pinngortitaleriffiup qilalukkat pillugit siunnersuinera saqqummiunneqarpoq
Qilalukkat qernertat aasaanerani sumiiffinni assigiinngitsuni arfineq-pingasuni uninngaartarfeqartarput, sumiiffinnullu piniarfiusartunut assigiinngitsunut pineqartunut siunnersuinerit assigiinngitsorujussuupput.
Upernavimmut tunngatillugu 2016-2020-mut pisassiissutigineqarsinnaasutut innersuussutigineqartut ukiunut siuliinut sanilliullugu ikileriaateqarput. Tamatumani uumassusilinnik ilisimatuut immikkut erseqqissaateqarfigaat Upernavimmut eqqaanullu qilalukkanik ”pilersuisuusup” aammalu ikinnerusutigut Uummannamut Qeqertarsuullu Tunuanut, tassalu Qimusseriarsuarmi qilalugaqatigiit qilalugartai amerlasoorsuunngimmata taamaattumillu pisaqarfigineqarpallaartarnissaminnut qajannartuullutik.
Agguaasseriaaseq atortinneqalersoq nutaaq naapertorlugu Uummannap eqqaani pisassiissutigineqarsinnaasut amerlineqarsinnaanerat periarfissaalerpoq, tassami Uummannap eqqaanilu pisaasartut amerlanerpaartaat Canadami qilalugaqatigeerujussuarnit (qernertat) aasaanerani sivisuumik taakaniittartunit Somerset Islandimeersuusarnerat uppernarsarneqarmat.
Qilalukkat qernertat Tunup imartaaniittartut qilalugaqatigiittut ataatsitut isigineqarput, tassa Tasiilap eqqaaniittartut aammalu Ittoqqortoormiit eqqaaniittartut.
Innersuussutigineqarpoq tappavunga pisassiissutaasartut tamarmik ikileriartinneqarnissaat, tassami tappavani ataasiaannarluni 2008-mi kisitsisoqarnikuummat.
Qilalukkanut qaqortanut tunngatillugu pissutsit piuminarnerupput, tassami qilalugaqatigiit ataasituaat Canadap avannaani aasisartut Nunatta kitaanut Qaanaallu eqqaanut pilersuisuummata. Kalaallit Nunaata Kitaani amerlanerpaamik 320-t ukiumut pisassiissutigineqartariaqaraluartut innersuussutigineqarpoq. Siunnersuinermi uani pisassiissutigineqarsinnaasutut innersuussutigineqartut taamaalillutik siornatigut siunnersuinermut sanilliullugu qulinik amerleriaateqarput.
Kiisalu erseqqissaatigineqarpoq qilalukkat qaqortat aasaanerani Nunatsinniittartut ikitsunnguusut, taamaattumillu uumassusilinnik ilisimatuut kaammattuutigaat piffissanik eqqissisimatitsiviusussanik atuutilersitsisoqassasoq.
Qilalukkat qernertat | Etah | Qaanaaq | Upernavik | Uummannaq | Qeqert. Tunua | Tasiilaq | Ittoqqort. |
Siunnersuineq 2016-2020 | 5 | 98 | 70 | 154 | 97 | 16 | 50 |
Maanna pisassiissutit | 85 | 81 | 81 | 59 | 18 | 70 |
Takuneqarsinnaasutut Etah, Qaanaap avannaaniittoq, nutaatut aqutsiveqarfittut immikkoortinneqarluni tallimanik qilalukkanik qernertanik pisassiissuteqartoqarsinnaaneranik innersuussuteqarfigineqarpoq.