Pinngortitaleriffimmut qinnuteqartoqarsinnaanngorpoq

Aningaasaliissutit 10 millionit koruunit ph.d.-nngorniarluni atorfinnut pingasunut aamma post doc-itut atorfimmut ataatsimut ukiormannamut atorfinittussanngorluni qinnuteqaatigineqarsinnaanngorput.
 
Ph.d.-ngorniutissat marluk aamma post doc-itut atorfik ataaseq, Danmarkimi naalagaaffiup aningaasaliissuteqarfigai, taakku Issittumi Ilisimatusarnernut aningaasaliissutineersuullutik.

Namminersorlutik Oqartussat ilisimatusarnernut aningaasaliissutinit ph.d-nngorniutissaq ataaseq aningaasaliissuteqarfigaat.
 
Aningaasaliissutit Danmarkip Kalaallit Nunaatalu akornanni ilisimatusarnikkut suleqatigiinnermut siuarsaataassapput, ilisimatusarnerup ineriartortinneranut aamma apeqqutini Nunatsinni ilisimatusarnernut tunngassuteqartuni ilisimatusartartussanik inuusuttunik qammaanermi iluaqutigineqassallutik.

Qinnuteqaatit Kalaallit Nunaanni Ilisimatusarnermut Siunnersuisoqatigiinnit ilisimatusariaatsinit tamaginneersunit tunuliaqutaqartumit pingaarnersiorneqassapput, Pinngortitaleriffik allaffissortuulluni.
 
Pinngortitaleriffiup pisortaata Klaus Nygaardip oqaatigaa qinnuteqartitsinertik siorna iluatsilluartorujussuusoq, qinnuteqaatit 42-t tiguneqarmata.

- Kalaallit Nunaannut tunngassuteqartunik ilisimatusarusunnerit soqutigineqarluartut paasinarpoq. Aningaasaliissutitigut ilisimasanik piginnaasanillu pilersitsineq tamakkiisoq Kalaallit Nunaata pisariaqartippaa, Pingortitaleriffiup pisortaa Klaus Nygaard erseqqissaavoq.
 
Ilisimatusariaatsini sammivinnit tamaginneersut qinnuteqarsinnaatitaapput.
 
Qinnuteqarfissaq kingulleq tassaavoq apriilip 15-iat 2014.