Pinngortitaleriffik Niaqornani sullivittaarpoq
Uummannap eqqaani Niaqornani illu Pinngortitaleriffimmit aaqqissuuteqqinneqarpoq, najugaqarfissatut sullivissatullu novembarip aallaqqaataaniit atorneqalerluni.
Pinngortitaleriffiup sullivittaarnermigut piniartut biologillu suleqatigiinnerulernissaat, aamma biologit suleriaasiinik piniartullu atugaannik paasinninnerup annerulernissaa neriuutigaa.
Qilalukkat qernertat qaqortallu qassutinik pisareriarlugit qaammataasakkut aallakaatitsissutinik ikkussuiffiginissaat biologit piniartullu suliassaasa siulliit ilagaat.
Piniartut biologillu suleqatigiillutik qilalugaq qernertarsuaq angutiviaq qaammataasakkut aallakaatitsissusereersimavaat.
Qilalukkat aallaakaatitsissusernerisigut timmisartuminngaanniillu kisinneqarnerisigut amerlassusaat naatsorsorneqarsinnaavoq, qilalukkallu iluaqutigalugit Baffinip Kangerliumarngani ukiup ingerlanerani immap nillissusaa nalunaarsorneqarsinnaalluni. Qilalukkat ullormut arlaleriarlutik aqqartarput, immallu itissusaanit assigiinngitsunit nillissutsimik paasissutissat qaammataasakkut Pinngortitaleriffimmut nassiunneqartassallutik.
Qaammataasakkut aallakaatitsissutit atorlugit qilalukkat upernaakkut ukiakkullu ingerlaarfigisartagaat paasineqarsinnaavoq ilaatigullu Qeqertarsuup Tunuata avataani avannaanilu uuliaqarfiusinnaasut aqqusaartassaneraat aamma misissorneqarsinnaalluni.
