Pinngortitaleriffik avatangiisit misissornerannut akisussaalerumavoq
Naalakkersuisut avatangiisinut tunngassutilinnik paasissutissanik pisariaqartitsinermi Aarhusip Universitetiata avatangiisinut nukissiuuteqarnermullu tunngasunut immikkoortortaqarfia, DCE-mik naalisarneqartartoq, saaffigisarpaat, tamatumunngalu atatillugu Nunatsinni Pinngortitaleriffik siunnersuisartutut inissisimatinneqartarluni. Pissutsilli maanna mumisinneqarnissaat siunniunnialerparput, Pinngortitaleriffiup siulersuisuini siulittaasoq, Gert Mulvad, oqarpoq.
Anguniagarlumi taanna 2017-ip tungaanut suleriusissanut Pinngortitaleriffiup pilersaarusiaani siulersuisunillu akuerineqaqqammersumi atuarneqarsinnaavoq.
Avatangiisinut tunngasunut ilisimatuussutsikkut misissuisarnerit naliliisarnerillu Pinngortitaleriffimmiut maanna pikkorissarfigileruttorpaat. Taamaaliornissaallumi pissusissamisoorsorinarpoq, nunatsinnimi aatsitassarsiornerup inerisarneqarnera, suliffeqarfissuarnillu inerisaaneq, maanna taama siuarsimatigimmat akisussaaffimmik tigusinissamut piffissanngorpoq, Pinngortitaleriffimmiut tikkuaapput.
Suleriusissanut pilersaarutit malissagaanni ukiuni tullinnguuttuni pingasuni/ sisamani pinngortitalerinermut ilisimatusarsinnaanerup Nunatsinni Ilisimatusarfimmi neqeroorutaalersinnaanissaa anguniarneqarpoq, kalaallillu pinngortitalerinermik qaffasissumik ilinniagaqartartut amerlassuserisartagaat taamaalilluni aalaakkaasunngortinniarneqarluni.
Pinngortitaleriffimmiut siornatigut anguniakkatut siunniussimasaasa tamarmik anguneqareersimaneri Pinngortitaleriffimmiut tupinnanngitsumik tulluusimaarutigaat. Pinngortitaleriffiup neqeroorutigisinnaasai annertusineqarsinnaasimapput, silap pissusaa pillugu misissuisoqarfiliortoqarluni, Pinngortitaleriffiullu umiarsuaarartaavata, Sanna-p, Adolf Jensenitoqaq taarsersinnaasimallugu.
