Pinngitsuutitaasoq

Tamatumani pineqarpoq angutip 66-inik ukiullip arnamik inooqatiminik siorna juulimi Nuussuarmi toqutsisimaneranik pinngitsuutitsineq. Atuagagdliutit aqagu saqqummersussat taama allaaserisaqarput.

Nunatta Eqqartuussivia isumaqarpoq, unnerluussisut – 66-inik ukiullip inooqatigisaminik 58-inik ukiulimmik qimillugu toqutsisimanera uppernarsarsinnaanngikkaat.

Angutip puiortunngortutut naliliiffigineqartup siorna aasakkut ullaami pisimasut eqqaamasarfigivallanngilai, maannalu pissusissamisuunngitsumik tigummigallarneqarnerminut taarsiivigineqarnissani piumasarilersaarpaa. Naalagaaffiup eqqartuussissuserisuata kisitsisaatai naapertorlugit 66-inik ukiulik 97.500 koruunit aamma 125.900 koruunit akornanni taarsiiffigineqarsinnaasoq, AG-p naatsorsorsimavaa.

Angut nassuiaavoq unnukkut erngussimallutik oqqattoqarsimasorlu, kisiannili innarsimallutik.

Ullaakkut iterami inooqatimi niaqqi akitsimi ataaniitikkaa naammattoorsimavaa.