Pinngitsaaliisimasorisaq tigummigallagaavoq
Angut arnamik pinngitsaaliisimasutut Nanortalimmi ippassaq tigusarineqarpoq. Suliallu paasiniarneqarnerani angut Qaqortumi tigummigallarneqassaaq.
Allattoq Najaaraq Egede
maajip 16-at 2011 10:57
Qaqortumi politiit ima oqaluttuarput:
-Nanortalimmi politiit arnamik pinngitsaaliisoqarsimaneranik arfininngornerup sapaatillu akornanni sianerfigineqarput. Politiit angut pasineqartoq kingusinnerusukkut tigusaraat eqqartuussisunullu sassartitassanngorlugu. Eqqartuussivik aalajangerpoq, politiit susoqarsimaneranik paasiniaaneranni, angut ulluni 26-ni tigummigallarneqassasoq, Erik Rasmussen taama ilisimatitsivoq.
Politiit maannakkuugallartoq pinngitsaaliisimanermik oqaatiginninnermut tunngatillugu ilisimatitsisinnaanngillat, angut arnarlu pineqartut qassinik ukioqarnerannik aamma unnuami susoqarsimaneranik, pisimasut maanna misissorneqarmata.
