Pinnersaasiornermik sammisaqartitsineq inuusuttunut iluaqutaassaaq
Tuluit ussataat 'One man's trash is another man's treasure" eqqumiitsuliortut pingasut Tasiilami sammisaqartitsineranni eqqaanartuutaavoq. Tassami eqqumiitsuliortut pingasut pinnersaasiornermik sammisaqartitsissapput, taaguuserlugu *Pinnersaasiorneq - saviminikoq kusanartuliaralugu*.
- Siunertaavoq meeqqat inuusuttullu takorluuisinnaassusermik, kreativitetimik taallugu, suliaqartinnissaat, Mia Skifte Tasiilami Inuusuttut Illuanni aqutsisoq oqarpoq.
Eqqumiitsuliortoq Buuti Pedersen, kuultinik saffiortoq Nicolai Appel, taassumalu ilinniartua Nadja Arnaaraq Kreutzmann sammisaqartitsissapput.
Nadjap ilaatigut ilisimaneqaatigaa inuit kakiorneri isumassarsiorfigalugit pinnersaasiarisimasani "Panikpanik".
Atuanngiffimmi sammisassaq
Pinnersaasiornermik sammisaqartitsineq Kommuneqarfik Sermersooq suleqatigalugu aaqqissuussaavoq. Meeqqat inuusuttullu atuanngiffeqarnerminni sammisassaqartinneqarnissaat suliami anguniagaavoq.
Meeqqat inuusuttullu ilusilersuinermik aallussillutik ilinniartinneqassapput, taamaasillutik ilikkakkatik inuunerminni atorluarsinnaaniassammatigit.
- Ulluinnarni takorluuisinnaassusaat siunertaavoq qaffassinnaanissaat, tamanna aamma periarfissatsialaavoq. Ulluinarni eqqagassat isigigutsigit saviminikut igiinnagassaajunnaarlutik kisianni atortussatut isigineqarsinnaalernissaat, Mia Skifte oqarpoq.
Nicolai Appelip neriuutigaa Tasiilami meeqqat inuusuttullu gultimik pinnersaasiornermik nuannarisaqalerumaartut.
- Pinnersaaniornermi assaallu sulineranni timi eqqissisarpoq nuannersumillu ataatsimoorneq pinngortarluni. Pinnersaasiat pilluarnermik nassataqarsinnaasarput ulluni taarnerusinnaasuni eqqaassutissatut atorluarneqarsinnaallutik. Sammisaqartitsinermi inuusuttut namminneq isumassarsiatik tunngavigalugit pinnersaasiussapput, imminnut isumalimmik pinngortitsinissaq siunertaralugu, Nicolai Appel tusagassiutinut nalunaarummi oqarpoq.
Katersuiniarnermut ilanngullugu gultinik pinnersaasiortartoq Nicolai Appel eqqumiitsuliortorlu Buuti Pedersen nannunik kappoqqutinik nunatsinneersunik atortulersukkanik suliaqarput. Aningaasat katersorneqartut katillugit 1,2 millionit koruunit missaanniipput.
Aningaasat katersorneqartut ilaatigut meeqqat pisinnaatitaaffiinut tunngasunik atuartitsissutissanik suliaqarnissamut atorneqartussaapput, taakkua annerusumik kinaassutsimut, kulturimut, ataqqeqatigiillunilu akaareqatigiinnermut samminnittussaapput.
Aningaasallu katersorneqartut aamma Tasiilami sammisaqartitsinermut atorneqassallutik.
Gentofte Kommune UNICEF Kalaallit Nunaannut aningaasaliissutissanik 2018-imi katersititsivoq. Aningaasallu katersorneqartut meeqqanik inuusuttunillu suliniutinut atugassaapput, taakkua ilaat Tasiilami sammisaqartitsinermut atorneqassallutik.
Pinnersaasiornerup silarsuaa
Pinnersaasiornerup silarsuaata ilinniarfiginissaa sammisaqartitsinermi aammattaaq siunertaavoq:
- Naatsorsuutigaara ilinniutaangaatsiassasoq tamatsinnut. Ukua eqqumiitsuliortut tikittussat eqqarsartariaasaat ukua atortussat eqqarsaatigigutsigit, ukua atortussat qanoq isigisinnaavagut, qanoq atorsinnaavagut. Tamakkua tungaatigut takorloorsinnaavara ilinniutaassasoq, Mia Skifte Tasiilami Inuusuttut Illuanni aqutsisoq oqarpoq.
Sammisaqartitsineq juulip aallaqqaataanit tallimaat tikillugu Tassilami pissaaq.
