Piniartut utoqqalisut piniartutut allagartaarneqartariaqanngillat

Piniartut utoqqalillutik utoqqalinersiaqalersut piniarnermut allagartaarneqartarnerat piniartumut atugaasarpoq artornartoq. Piniartut utoqqalinersiaqalersut inuussutissarsiutigalugu piniartutut allagartaarneqartarnerat pillugu Inatsisartut aqagu oqaluuserisaqassapput. Piniartullu utoqqalillutik utoqqalinersiaqalernerminni allagartaaruttarnerat piniartumut Uummannarmiumut Pavia Nielsenimut naliliivigitipparput.

- Taanna ilaatigut ajornartorsiutaasarpoq nalunngilara; piniartut utoqqalisut illuatungaatigut peqqissutut ingerlaniarneq, timip pissusiisigut killilersorneqalersillugu, taava aamma illuatungaatigut allangartaajangaanissaq allangartaajangaasarnerlu imaannaanngilaq, qamuuna misigisaassooq misingisaasarlunilumi imaannaanngitsumik annernartumillu.

Pavia Nielsenip tusagassiutit ilaanni tusarimasani assersuutigaa:

- Inuusuttunngornerminiik piniartuusimalluni allamillu ingerlataqarsimanani, inuunermini kunga iliarsaalerami utoqqalinersiutillu tikikkamigit taava allangartaajangaasimasoq, soorunami inuk taannanuannaarpalunngitsoq tusarparput. Maani avannaani taamaattunik aamma naammattuugassaqartarpugut. Kisianni, tamakku annerusumik maallatigineqartanngillat, nipangiinnaqqajaasarneq ajoraluartumik aamma atugaasarami. Kisianni tamakku maanna oqallisiginiarneqalermata assut qujanarpoq.

Pavia Nielsenip neriuutiginerarpaa, pissusiviusut misilittakkallu aallaavigalugit iluarseeriartoqarumaartoq.

Piniarnermik aalisarnermillu ukiuni qulini ingerlaannartumik inuussutissarsiuteqarsimasut utoqqalinersiaqalernerminni, inuussutissarsiutigalugu allangartaqaannartalernissaat pillugu, piniarneq aallaaniarnerlu pillugit inatsisip allanngortinneqarnissaanik saqqummiusseqqullugit, Naalakkersuisut peqquneqarnissaannik, Siumut Inatsisartuni ilaasortaatitaasa siunnersuutaat, Inatsisartut aqagu pingasunngornermi ataatsimiinneranni oqaluuserisassat akornanniippoq.