Piniartut sorsuutissarpassuaqarput
Puisit amiinik EU-p eqqusseqqusiunnaarnera piniartunut assut sunniuteqartoq Bendt Frederiksen Nuussuarmeersoq, oqarpoq.
- Soorlu ammit avammut tunineqarnerat unitsinneqarmat, puisip amia Great Greenlandip 300 koruuniniit 240 koruuninut akikillivaa, tamannalu assut sunniuteqarpoq. 60 koruunit piniartunut assut isumaqarput. Piniartoq qulinik ameeruni 600 koruuninik isertitakinnerussaaq, Bent Frederiksen oqarpoq.
Ajornartorsiornerup nalaani piniartukkormiut inunnik isumaginninnermut saattariaqartartut aamma oqaatigaa.
- Nalunngilarput piniarnerliornerup nalaani inunnik isumaginninnermut saaffiginnittoqartariaqartartoq.
Taamaattoq Bendt Frederiksen nikallortitassaanngilaq.
- Sunalunniit aaqqinneqarsinnaanngitsutut takorloorneqarsinnaanngitsoq. Sulinikkut, nutarterinikkut naleqqussarnikkut aaqqinneqarsinnaallunilu oqinnerulersinneqarsinnaavoq, tasami naleqqussarneq kalaallit qangarsuarli pikkoriffigivaat, Bent Frederiksen oqarpoq.
