Piniartut piumasaat politikkikkut taperserneqarpoq
- Sumiiffigisami pissutsinik ilisimaarinnittumik Inuussutissarsiornermut siunnersorteqarnissaq pisariaqarpoq. Naluneqanngitsutuut aasaq tamaat qilalugarniartarpugut, ukiakkullu oktobarip aallaqqaataaniit aarrit pinialertarpagut. Piniakkavulli killilersorneqartuarput, taamaammat inuussutissarsiornermik siunnersorteqaannarnissarput qulakkeerneqartariaqarpoq, piniartoq Qaanaarmiu Jens Danielsen oqarpoq.
Qaanaaq aasaq manna juulip aallaqqaataaniit inuussutissarsiornermut siunnersortaaruttussanngortoq tusaramiuk, siunnersorteqaannarnissaq Jens Danielsenip Qaasuitsup Kommuniani suliniutigisimagaluarpaa, iluatsinngitsumilli.
Piniartut allat marluk, Rasmus Avike aamma Aaqqiunnguaq Qaerngaq Qaanaap inuussutissarsiornermut siunnersorteqannginnera siusinnerusukkut aamma isornartorsiorpaat, sumiginnarneqartutut misigisimallutik.
- Quianaatsorsuuvoq. Soorlu inuttut naleqanngitsutut avinngarusimasumiittugut misigisimavugut, Rasmus Avike ilaatigut oqarpoq.
Qaanaami piniartunut siunnersorti qaninneq maanna Upernavimmiippoq, Jens Danielsenillu tamanna eqqarsarnartoqartippaa, kommunalbestyrelsillu maannangaaq iliuuseqartariaqarnera ujartorlugu:
- Kommunimi sammineqaqqittariaqarpoq. Ajornartorsiummi annertusiartuinnartoq paasinarsereerpoq, kommunalbestyrelsillu nalilersoqqissaartariaqarpaa, piniakkat tamaani killilersorneqartorujusuummata. Nunatta sineriaani sumiiffinnut allanut sanilliullugu aamma piniartoqarfiunerpaavugut, tamanna eqqarsaatigineqartariaqarpoq, Jens Danielsen oqarpoq.
Inuussutissarsiornermut siunnersortinik sumiiffinni allani amigaateqartoqarnersoq, KANUKOKA-p KNAPK-llu ilisimanngilaat, KNAPK-minngaanniilli oqaatigineqarpoq Qaanaami piniartut siunnersorneqarnissartik pillugu KNAPK-mut qaqugukkulluunniit saaffiginnissinnaasut.
