Piniartut nalunaartanngitsutut pasillerneqartut

Piniarnermut Naalakkersuisoqarfimmit januaari naasoq tusagassiutitigut nalunaarutigineqarpoq Qeqertarsuup Tunuani Uummanamilu qilaluarniarneq unitsinneqartoq piniartut pisaminnik nalunaaruteqartarsimanngimmata. Taamannali piniartunit ilisarineqarsinnaanngilaq:

- Pisussaatitaaffigaarput nalunaaruteqassalluta pisaqarsimagutta. Taamaammat pisussaaffittut naammassisarparput. Tassa pisaqarnermi pilareerluta agguarnialeraangatta toqqaasarpugut; illit akuersissutaatit atussooq ullumikkut.

Taavalu arlaliusimappata nalunaartussat, akuersissutaatillit arlallit nalunaartuutittarpagut, Qeqertarsuarmi Aalisartut Piniartullu Peqatigiiffiani siulittaasup tullia, Kali Mølgaard, oqarpoq.

Aamma Uummannarmiunit nalunaartoqartarsimannginnermik oqarneq pasilliinertut isigaat:

- Pisussaatitaavugut pisaqarsimagutta immersueriarluta aqqutissallugu kommuunip allaffianut. Taannalu aqqutereerutsigu pisassat nungussimanngippata aamma allamik pappialamik qilaluarsinnaanermut akuersissummik tunineqartarpugut, Uummannami aalisartut piniartullu peqatigiiffianni siulittaasoq, Pavia Nielsen, oqarpoq.

Taamaattumik piniartut Aalisarnermut Piniarnermullu Naalakkersuisoqarfimmit eqqunngitsumik pineqarsoripput:

- Tassa nassuiassagakku nassuiaatissaa naatsuaraavoq: Eqqunngitsumik pineqarpugut. Pisariaqassappat allatut ajornartumik qanoq iliuuseqartariaqartussaavugut. Immaqa sallu atorlugu ilaatigut inuussutissarsiornitsinniit unitsitaavugut. Tassa sippuinngikkaluarluta sippuititaavugut, Kali Mølgaard oqarpoq.

Uummannami januaari aallartimmat qernertanut qilaluartassat 85-iupput qaqortanullu 15-iullutik. Taamanermiillu piniartut 20-nik pisaqarsimallutik nalunaarsimapput:

- Taakkualu ikigalugit maangaanniit tamakkunannga sullissisut KANUANA-mut nalunaaruteqarsimapput 40-nik pisaqartoqarsimasoq uppernarsaatissaqanngitsumik. Taavalu 20-nnaat nalunaarsimasut, Pavia Nielsen oqarpoq, nangillunilu:

- Tusatsiakkat aallaavigalugit pisortatigoortumik sulisoqarsinnaanngilaq. Tassa imaappoq uagut piniarfimmi ilaatigut nuannaarnermut soorlu qilaluaq ataaseq sisamaakkutsigu imaluunniit arfinilliukkutsigu, nuannaarnermik ilaquttatsinnut kalerriisarpugut pisaqarpunga, pisaqaqataavunga, Pavia Nielsen oqarpoq.

Taanna isumaqarpoq piniartut qujasaasarnerannit nakkutilliisut amerlanaaralutik immaqa nalunaarsuisarsimasut:

- Taava tamakkua immaqa nalunaartartut radioqarsimassagamik aamma, pisortatigoortumik sulisut, tamakku immaqa qujasaasut aallaavigalugit qilaluaq ataaseq sisamaanneqarsimasoq qilalukkatut sisamatut nalunaarsortarsimagunarpaat. Kisianni uppernarsaatissaqanngikkaluarpunga. Kisianni taamaassimammat uppernarsaatissaqanngitsunik 20-nik ilasimavaat taakkua piniartut pisaat nalunaarutaasut, Pavia Nielsen oqarpoq.

Qeqertarsuarmi Uummannamilu piniartut saniatigut, piniartut Aasiammiut aamma qilaluarniarnerat unitsinneqarallaqqaavoq Aalisarnermut Piniarnermullu Naalakkersuisoqarfik kalerrinneqarsimammat piniartut qilalukkat tallimat pisatik nalunaarutigisimanngikkaat. Taamali pasilliuteqarneq aamma tassani piniartunit ilisarineqarsinnaanngilaq.