Piniartut meeraat piniartoorusunngillat

Silap pissusaata allanngoriartornera ilaatigut pissutaatillugu piniartutut inuussutissarsiorneq ilungersunarsigaluttuinnarmat, sanasutut ilinniarniarlunga aalajangerpunga, Siorapalummiu 17-inik ukiulik Kaugunnaq Alataq taama oqarpoq.

Taassuma angutaa, Otto Simigaq, piniartuuvoq.

- Silap pissusaata allanngoriartornera ilaatigut pissutaalluni piniakkat tammariartuinnarput. Taamaammat piniartut aningaasarsiornerat ilungersunarsigaluttuinnarluni. Kaugunnaq Alataq oqarpoq.

Siorapalummut uteqqikkusussinnaagaluarnerarpoq, siunissarli eqqarsaatigalugu illoqarfimmi najugaqarnissani orniginartinnerullugu. Tassanimi aningaasarsiorsinnaanissani ilimagineruaa.

Piniartuuneq kulturitsinnut pingaaruteqarluinnarmat attattuarneqartariaqartoq, piniartoq Kangersuatsiamiu, Edvard Kristiansen oqarpoq, nerisassallu nunanit allanit eqqunneqartartut annikillisarneqarnissaat ujartorlugu:

- Kulturi piniarnermut tunngasoq nerisaqarnermullu tunngasoq ingerlateqqissallugu pisussaaffeqarnera pingaartippara. Meeqqakka inuiaqatigiillu eqqarsaatigalugit taama pisussaaffeqarpunga, piniartoq Edvard Kristiansen, Kangersuatsiarmiu oqarpoq, nangipporlu:

- Nerisassat avtaaninngaanniit eqqussorneqartut qanoq iliornikkut killilersimaarneqarsinnaasuuppata, piniartuunerup inuussutissarsiutitut ataannarnissaa immaqa qulakkeerneqarsinnaagaluarpoq. Ernera oqarfigineq ajorpara piniartuussasoq piniartuussannginnersorluunniit. Tamanna nammineq aalajangerumaarpaa, Edvard Kristiansen oqarpoq.