Piniartut inuunerat filmiliaraat

BBC-mi filmiliortartut sisamat Uummannap avannaani nunaqarfimmi Saattuni piniartut inuunerat pillugu sapaatip akunnerini marlunni filmiliorput.

TV-qarfissuarmi BBC-mi aallakaatitassiarineqartartumi, Human Planetimi, issittumi inuuneq taamaalilluni nangittaqattaartunngorlugu aallakaatitassiarineqartussanngorpoq.

- Piniartut ilaqutariit inuunerat nunaqarfimmi malittaraarput, ilitsersuisoq, Nicolas Brown, Nunatsinni Takornariaqarnermi Inuussutissarsiornermilu Siunnersuisoqatigiinnut oqarpoq.

Filmiliornertilli annertunerusumik oqaaseqarfigerusunngilaa. Aallakaatitassiat aappaagu aatsaat naammassineqartussaapput, unammillertivullu arlaannik isumassarsitittariaqanngillat.

- Tupinnaannartumilli misigisaqarpugut!

Ullut tamaasa seqinnerpoq, kalaallillu inuiaat tupinnaannartumik ikiuukkumatupput. Suleqatigiit tamattaalluta kalaallinut piniartunut assorsuaq ataqqinnilerpugut. Qasusueqaat, inuuppullu qiimasut, Nicolas Brown oqarpoq.

Nunatsinni Takornariaqarnermi Inuussutissarsiornermilu Siunnersuisoqatigiit saniatigut takornariartitsivik Destination Avannaa filmiliortunut ikiuupput, minnerunngitsumillu Saattormiorpassuit aamma ikiuulluaqalutik.