Piniartoq: Piniartut ilaat pisassiissutinik tuniniaasarput
Kisianni Kommuneqarfik Sermersuup Namminersorlutik Oqartussallu tuttutassiissutinik tunioraanerat Aalisartut Piniartullu Kattuffianiit isornartorsiorpaat.
Tassami periaaseq pissutigalugu piniartut pisassinneqarsimasut ilaat pisassaminnik tuniniaasarput.
- Kikkut taamaasiortartut, aqqisigut taajornagit, kisianni taamaattoqartartoq takujuartarpara. Allaat neqeroorfigitittarpunga naaggaartarlungalu, NAPP-ip siulittaasuata tullia, Aslak Jensen oqarpoq.
Aslak Jensen NAPP-ilu naapertorlugu, piniartut angallateqanngitsut tuttutassinneqartarnerat ajornartorsiutaasoq.
Tuttutassat piniartut namminneq piniarneq ajugaat, piniartunulli allanut tuniniartagaat, Aslak Jensen oqarpoq.
- Mamaappoq isigalugu ilaasortaqatinnguakka angallateqarlutik ukioq kaajallallugu ingerlarsortut. Qinnuteqaraangata tunineqassanatillu saniatigullu angallateqanngitsut tunineqartartut. Taanna uanga peqatigiiffimminngaanniit akuersaasinnaanngilluinnaqqissaarpara.
Immikkoortitsisoqassanngilaq
Ajornartorsiut KNAPK-mi ilisaraat, taamaakkaluartoq immikkoortitsisoqassanngitsoq pingaartippaat.
- Soorunami piniarnermut allagartaqaruni immikkoortinneqarsinnaangilat, taavalu uani piumasaqaatinik immaqa takussutissaqarpallaarunanngilaq oqartunik umiatsiaqartussaatitaaneq atortoqartussaatitaaneq imaluunniit qanutut, KNAPK-mi siulittaasoq, Henrik Sandgreen oqarpoq.
Piniartut tamarmik amerlaqatigiinnik pisassinneqartasasut, Aslak Jensen siunnersuuteqarpoq.
- Pisassat taakku killillit iluani piniartut tamarmik assigiimmik pisassinneqarsinnaagaluaramik tallimanik, taavalu pisaqaraanni ingerlaannaq tuniniaalersinnani akuersissutini kommunimut utertissavaa, oqarlunilu tuttut tallimat pisaraakka, aajukua, Aslak Jensen oqarpoq.