Piniartut allagartulersuinissaq ujartorpaat
2008-mili paasineqaraluartoq Pituffimmi eqqaani kujataanilu plutoniumimik mingutitsisoqarsimasoq piniartut paasitissallugit iliuuseqartoqarnikuunngilaq. Tamannalu piniartut eqqumiigaat. Nunammi mingutsinneqarsimasut allagartalersorneqartariaqarsorigamikkit. Jens Danielsen oqarpoq:
- Nunat plutoniumimik mingutsinneqarsimasut allagartalersorneqarsimannginnerat nuannarinngilara. Tamannalu pisortanit suusupajugineqarnertut paasinartippaa.
-Kalaallit uanilu Inughuit nikagineqarnerat takuteqigaat. Inuit ukua suulluanngitsut ilisimatittariaqanngitsullu, nikaginninnertut uanga taajumavara, oqarpoq.
- Pituffimmi radareqarfiup avataani allagartaqarpoq radarit qanilleqqusaanngitsut peqqissutsimut ulorianaateqarsinnaammata, taamatuttaaq nunat mingutsinneqarsimasut iliuuseqarfigineqartariaqaraluartut, Jens Danielsen isumaqarpoq.
Qaanaami piniartut Narsaarsummi kujataanilu umimmanniarlutillu, ukalerniarlutillu, terianniarniarlutillu, aqisserniarlutillu appaliarsunniartarput. Tamannalu allagartalersorneqassappat sumut piniariartassappat?
-Siorapaluup avannaatungaani Itahmi umimmanniartalissagaluarpugut, Jens Danielsen oqarpoq.