Piniartut alapernaarsuisunngortikkusunneqarput

Siriusip qimusserlutik alapernaarsuisartui Thule-mi piniartunit ikiorserneqartussanngorput.

Nunanut allanut naalakkersuisoq Josef Motzfeldt Sermitsiamut oqarluni siunnersuuteqarpoq; Siorapalummiit avannamut Petermann Gletscher-i tikillugu alapernaarsuisoqarneq ajormat taamaalillugu alapernaarsuineq avammut tallineqarsinnaasoq.

Tamatuma nalaa aalajangersimasumik danskinit kalaallinilluunniit nunamik piginnittuunermik takutitsiniarnermik imalimmik nakkutigineqanngilaq.

Taamaattoqarneralu naalakkersuisunut ilaasortap Josef Motzfeldtip maanna allanngortinnialerpaa.

Avannaarsuani alapernaarsuisoqartannginnera Illersornissamut ministeri Søren Gade peqatigalugu oqaluuserineqartareerpoq. Ministerillu taassuma alapernaarsuinerup annertusarnissaa itigartitsissutigaa, aalajangernerminut tunngavilersuutigalugu, alapernaarsuisartut naliliisimammata nunatta Canadallu akornanni kangerliumarngit aqqutai amippallaartut taamalu siku tamaaniittoq aqqutigissallugu navianaateqarpallaartoq.

Maannalu Josef Motzfeldt siunnersuuteqarpoq, Siriusip nunatta avannaani alapernaarsuinera annertusarnianngippassuk tamaani alapernaarsuineq piniartunit tiguneqarsinnaasoq.