Piniartut aalisartullu qangatut silasiorsinnaajunnaarput
Lene Kielsen Holm ilisimatuussutsikkut misissuinermik ingerlatsisoq taama paasisaqarpoq.
Anorip pissusaa imatut allanngorsimanerarpaat, nikerartorujussuanngorsimalluni. Siornatigut, ingammik ukiukkut, piffissami sivisuumi avannersinnaasarpoq, qatsorpallu aamma sivisoqataanik qatsungasarluni, tamatumalu kingorna anori alla aatsaat takkuttarluni. Massakkut imatut oqaatigineqarpoq, anorit ullup ataatsip ingerlanerani nikerarsinnaasalersimasut, Ilisimatuussutsikkut silap pissusaata allanngoriartorneranik misissuisoq Lene Kielsen Holm, oqarpoq. Piniartut aalisartut avatangiisinillu inuussutissarsiutillit qangaaniilli silap qanoq inissaannik natsersueriaaseqartut, ullumikkut silap qanoq innissaanik naatsersueriaasiat atorneqarsinnaajjunnaapajaartutut oqaatigineqarpoq. Silassaq radiukkut tusarliunneqartartoq, piniartunit aalisartunit avatangiisinillu inuussutissarsiuteqartunit, uppernarnerutinneqarpoq Ajoraluartumik qangatut silasioriaaseq atorsinnaapaajaartutut oqaatigineqarpoq, Lene Kielsen Holm oqarpoq.
Inuit Issittormiut Siunnersuisoqatigiiffiata, ICC-p aammalu Kalaallit Nunaanni Aalisartut Piniartullu Kattuffiata, KNAPK-p suleqatigiillutik paasiniaaneq ingerlappaat.
Ilisimatuussutsikkut misissuineq Qaanaamiit Nanortalik tikillugu ingerlanneqarpoq.