Piniartoq ujaarineqartoq nalaatsoorneriinnakkut nassaarineqartoq

Niels Skifte Josefsen marlunngornermi oktobarip 14-iani Atammiup kujataani Niaqunngunami aavariartilluni tammaanneqartoq ajunngitsoq ippassaq nassaarineqarpoq.

1: Rensdyrjægerne skulle mødes ved bunden af Niaqunngunaq. 2: Her blev Niels fundet af to fiskere

Allattoq Jaaku Lyberth

oktobarip 21-at 2014 17:49

Assimi:1. Niels Atammiup kujataani Niaqunngunami ujaarineqalerpoq. 2. Niels nassaarineqarpoq.

Ullut arfinillit paarnanik imermillu inuussuteqarpoq, taama oqaluttuarpoq 50-nik ukiulimmik Niels Skifte Josefsenimik ippassaq siumuisoq, Kasper Kristiansen, Atammimmeersoq.

Oktobarip 14-iani Niels angallammut utinngimmat ujaasineq aallartinneqarpoq, politiit qulimiguullit namminerlu piumassutsiminnik ujaaseqataallutik.

Aamma atuaruk Piniartoq ajunngitsoq nassaarineqartoq

Kasper Kristiansen erninilu Niaqunngunap iluani Tasiusarsuup avannaatungaata kitaatungaani bundgarninik amooriareerlutik nilliarpaluttumik tusaasaqalerput. Nipi tusaasartik ornillugu Niels sissamut pereersimasoq naammattoorpaat.

- Eqqumiikujuppoq. Qiiaamminaannarporluunniit naammattuussanganngeruttorlugu naammattooratsigu, Kasper oqarpoq nangillunilu:

- Isikkamigut qerussorsimavoq nukillaangallunilu.

- Niaqunngunap qinnguanit Tasiusarsuup tungaanut ulluni arfinilinni pisussimavoq uninnganaveersaarsimalluni, annikuitsinnarmik imertarluni paarnanillu sissamut qanittumiittuni nerisarsimalluni, Kasper Kristiansen oqarpoq.

Akunneq ataaseq affarlu missaanni sinittarsimavoq annoraarsuaq poorsuillu plastikkit marluk oqorsaatitut atortarlugit. Timersorluni kamippaat atortakkat træningskoot kamippagai.

Niels Niaqunngunami pisunnerani assut nittaappoq, angallammut utertussaalluni killormut aallarsimavoq tammarlunilu.

Niels Skifte Josefsen Atammimmi napparsimmaveeqqami uninngatinneqareerluni ualimut angallammik Maniitsumi napparsimavimmut nuunneqarpoq, tassani nunaqqataasut arlaqartut tikilluaqqusiartorput.