Uummannap eqqaani ukioq manna qilalukkat qernertat pisassiissutigineqartut 37-ipput. Taakkulu piniartunit kiisalu saniatigooralugu pinialuttartunit avinneqartussaapput.
Tamannalu piniartup Saattuneersup Apollo Mathiassenip naammaginngilaa.
- Qilalukkat qernertat amerlasoorsuullutik kangerlummut pulasarput, aalisagartortarput, aalisakkallu itinerusumut qimaasarput. Qalerallit aalisaruminaallisarput ungasiliarnissamullu sila apeqqutaasarpoq. Taamaattumik piniartut ilungersuatinneqartussaapput, pisassammi 37-iinnaapput, Apollo Mathiassen oqarpoq.
Aperaarput piniartut sulerissanersut.
- Naluara, suliartuinnartoqarsinnaanngilaq, suliffiillu tamarmik inuttaqarput, aamma piniartunik sulisussarsiornavianngillat.
Aperaarput qullersat aaqqiinissaat utaqqiinnarnagu piniartut namminneq inuussutissarsiummik nassaarniarsinnaannginnersut.
- Piniartut qilalugaqassutsimik ilisimasaminnik nillianerat paasineqartuuppat ajornannginnerpaagaluarpoq, naammattunillu pisassinneqarlutik, taava ajornartorsiut qaangerneqassagaluarpoq, oqarpoq.
Aperaarput nammineerluni siunnersuuteqarsinnaanersoq.
- Pinngortitaleriffimmi biologit ilisimasaat aallaavigineqartaramik, piniartut ilisimasaat aallaavigineqartuuppata naammattunik pisassiisoqarsinnaagaluarpoq. Qilalugaqassuseq aallaavigalugu pisassiissutaasartut ikippallaartaramik,
Saattuni piniartoq Uummannallu kommunalbestyrelseani ilaasortaq Apollo Mathiassen taama oqarpoq.
Ukioq manna Uummannap eqqaani pisassat 91-iusussaagaluarput siornali pisassat sinnerpallaarlugit pisaqamasoqarsimammat 37-iinnanngortinneqarsimapput.