Piniarnermut Siunnersuisoqatigiit isumaqataavoq

Piniarnermut Siunnersuisoqatigiit qilalukkanik pisasseeqqinneq taperserpaat, tusarniarneqarsimannginnertilli ippigalugu.

Piniarnermut Siunnersuisoqatigiinni siulittaasoq Jens Johansen ima oqarpoq.

- Biologit ilisimatusarnerat ukiuni 20-ni ingerlareerpoq, Kalaallit Nunaannili piniarneq ukiuni 100-likkaani ingerlanneqareerpo, Jens Johansen oqarpoq, nangillunilu:

- Biologit piniartullu illuatungeriissillugit naliliisoqartariaqaraluarpoq. Biologit kisitsisaataat piniartullu kisitsisaataat assigiinngippallaarujussuarput, piniarnermut siunnersuisoqatigiit siulittaasuat oqarpoq.

- Qilalukkanik qernertanik pisasseeqqittoqarnialermat piniarnermut siunnersuisoqatigiit aperineqanngillat. Taamaaliornikkut ersersinneqartarpoq piniakkanut oqallinnermi Piniarnermut Siunnersuisoqatigiit ilaannikkut suusupaginiarneqartartoq, siunnersuutigut ilaatigut suusupagineqartarlutik, Jens Johansen oqarpoq. Ilanngullugu oqaatigaa biologit piniartullu imminnut tusaaniarnerullutik siunissami sulisariaqartut.