Piniarnermut Naalakkersuisoq Bruxellesimi paasineqarluarpoq

Aalisarnermut Piniarnermullu Naalakkersuisoq Finn Karlsen atorfilittanilu massakkut EU-p qitiusumik aqutsisoqarfissuani Bruxellesimiipput, puisit nunatsinni qanoq atorluarneqartarnerat pillugu EU parlamentimut paasisitsiniaajartorlutik. EU-parlamentimi ilaasortat ilaasa, puisit amiinik EU-mut eqqusseqqusiunnaarnissaq anguniarlugu siornali atsiortitseqattaarnerat, piniartortatsinnut eqquinerlorujussuarsinnaasoq, paasititsiniaanermut tunngaviusoq Finn Karlsen oqarpoq.

-Puisip nunatsini inuiaqatigiinnut piniartartortatsinnullu taamatut suli qanoq pingaaruteqartiginera paasisitsiniutigivarput, taavalu aningaasarsiornerinnarmut atorneqannginnera, tassa nerisarineqarnera, qimminullu nerukkaatigineqarnera tamaasa nassuiaatigaavut. Finn Karlsen aamma oqarpoq nunatsinni pissutsit, soorlu najugaqarfiit, qanoq inuttutiginerput EU-mi kommisserinut nassuiaatigilluarneqarsimasut.

Finn Karlsen oqaluttuarportaaq, EU parlamentimi ilaasortanit arlaqartunit oqaluttuunneqarsimallutik atsiortitsinerit eqqunngitsumik tunngaveqarluni ingerlanneqarsimasut.

- Atsiortitsinermut atatillugu oqaatigineqarpoq; allaat oqaatsit atorneqartut ilagisimagaat, ”puiseeqqanik qiveerneqanngitsunik toqoraanermut akerliuivit”?. Taama aperineqartut angeraangata atsiortinneqartarsimasut Finn Karlsen oqaluttuarfigineqarsimalluni oqarpoq. Erseqqissaatigaa eqqunngitsumik tunngaveqarluni atsiortitsisarsimanernut tunngasunik namminneq saqqummiussaqarsimanatik, kisiannili oqaloqatigisatik arlallit taama namminneerlutik oqaluttuartarsimasut oqarpoq.

Paasisitsiniaaneq iluarisimaarneqarluartoq Piniarnermut Naalakkersuisoq unnersiorpoq, qanorlu aalajangiisoqarnissaa assut pissangarnerarpaa.

Puisit amiinik EU-mut eqqusseqqusiunnaarnissaq anguniarlugu EU parlamentemi ilaasortat ilaasa atsiortitseqattaarsimanerannik suliaq EU-p kommissioniani suliarineqartussanngorpoq, inatsisinngortinneqassanersoq isummerfigineqassalluni.