Piniarnermut Aalisarnermullu ilinniarfik Uummannamiissaaq

Suleqatigiissitap siulittaasuata KNAPK-imi allaffimmi pisortap John Biilmannip ilinniarfissap Uummannami inissisimanissaanik naalakkersuisut aalajangernerat eqqumiigivaa. Uummannami kilisaatinik aalisariutinillu anginerusunik aalisartoqanngilaq, ilinniartitsisorineqarsinnaasunik aamma sikukkut aalisarneq ilinniarfiliornissami eqqarsaatigineqanngillat.

KNAPK-imit suleqatigiissitamillu assut eqqumiigineqarpoq ilinniarfissap Uummanami inissisimanissaanik naalakkersuisut aalajangersimanerat. Suleqatigiissitamit ilinniarfiup Maniitsumi Sisimiuniluunniit inissinneqarnissaa innerssuutigineqarsimammat. Nunatta qeqqani ilinniarfiup inissisimanissaanut innersuussinermi tunngavilersuutigineqarpoq, angallatit anginerusut ineriartortullu inissisimammata. Maniitsumi ilinniarfiup inissisimanissaannut innersuussummi tunngavilersuutigineqarput, Maniitsumi inissisimammata ATI, Innovationsenter, Arctic Green Food, Maniitsoq Fiskeindustrilu tamannalu ilinniarfissmut akikinnerussalluni, John Biilmann oqarpoq.

Sisimiut soorunami aamma piukkunnarpoq. Uummannami angallateqanngilaq anginerusunik kilisaatinillu aalisarnermut ilinniartunik ilinniarfiusinnaasunik. Aalisarnermut ilinniarfimmik pilersitsinissami siunertaanngilaq sikukkut aalisarneq ilinniarneqassasoq. Silap pissusaata allanngoriartornera ilutigalugu Uummannap eqqaani ukioq naallugu sikussaarnikuuvoq.

Naalakkersuisut aalajangernerminnut tunngavilersuutaasa ilagaat, Uummannaq eqqaanilu piniartoqarsinnaammat, tamanna pillugu John Biilmann oqarpoq, nunatta qeqqani, Sisimiut Maniitsullu eqqaani piniartoqarsinnaalluarmat.

Piniarnermut Aalisarnermullu ilinniarfissaq Uummannami inissisimasussaq pillugu suleqatigiissitamik naalakkersuisut pilersitsippata KNAPK suleqataarusuppoq, ilinniarfiulli Uummannami inissisimanissaanik aalajangerneq nassuiaqquneqarpoq.