Piniarnermik ilinniarfimmi 15-it aallartissapput

Aalisarnermut piniarnermullu ilinniarfissamut, Uummannami ukiaru septembarimi ammarneqartussamut, inuusuttut Nanortalimmeersut, Tasiilameersut, Illoqqortoormiuneersut Qaanaameersullu qinnuteqarnerusimapput.
maajip 15-at 2009 06:43

Tunngaviusumik ilinniarneq atuarfimmiittarlunilu piniartuni aalajangersimasuni ukiuni marlunni ingerlanneqassaaq. Sermitsiami ullumi saqqummersumi tamanna atuarneqarsinnaavoq.

Aalisartooreerlutillu piniartooreersut takornariaqarnerup iluani aallaaniartitsinermik, pinngortitami angallassinermik ilinniaqqinnissamik, tunisassianik sanalukkanillu inerisaaqqinnermik uumasunillu ilisimatuunut ikiortaasarsinnaanermik neqeroorfigineqassapput.

Ilinniarnermi ilinniagassat nalinginnaasut saniatigut aalisarnermi piniarnermilu inatsisit, aningaasaqarnermut tunngasut, aalisarnermi piniarnermilu pisanik suliarinninneq piareersaaqqissaarnerlu, kiisalu atortuusiorneq atortuutinillu aserfallatsaalineq aamma ilinniartitsissutigineqartassapput.

Piniarnermik ilinniarfik Uummannamiisaaq, allaffiusimasorlu ilinniartunngortussanut siullernut 15-inut piareersarneqarpoq. Pilersaarutaavoq ilinniartunngortussat allat 15-it januaarimi aamma aallartissasut.

Aalisarnermi Royal Greenlandimi siunnersorti, David Olsen, aalisarnermik piniarnermillu ilinniarfissami forstanderissatut atorfinitsinneqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq