Piniarnermik aalisarnermillu nakkutilliisut alaatsinaannerulerniarput

Piniarnermut aalisarnermullu nakkutilliisut tuttunniarnerup umimmanniarnerullu nalaani nakkutilliinertik sakkortusiniaraat, Kommuneqarfik Sermersuumi piniarnermut aalisarnermullu nakkutilliisoq, Vittus Nielsen oqarpoq.
Allattoq Najaaraq Egede
juulip 31-at 2009 10:58

- Pisanik nalunaarsuiffiit kommunimut tunniunneqartartut amerlagisassaaneq ajormata nakkutilliinerulerniarpugut aamma piniarnermut uppernarsaateqanngitsut piniarnermulluunnit akuersissuteqanngitsut siumoraangatsigut maleruaqqusat naapertorlugit politiinut tamatigut nalunaarutigisussaatitaavavut, taamaattumik inuttut akisussaaffigaarput piniarnermut akuersissummik uppernarsaammillu nassataqarnissarput, nakkutilliisoq Vittus Nielsen nassuiaavoq.

Aamma oqarpoq, unioqqutitsillutik piniartartut suli siumugassaasarmata utoqqatsissutit ukiormanna iluaqutaanavianngitsut.

- Piniarnermut akuersissutillit pinngitsooratik pisatik nalunaarsortussaavaat, pinngortitaleriffik tuttoqassutsimut umimmaqassutsimullu malinnaasariaqarmata, oqarpoq nangillunilu:

- Akuersissuteqaratik tuttunniartut ukiut tamaasa siumoraangatsigit ilaatigut oqarfigineqartarpugut: ”Puigorsimagakku” imaluunniit ”qimassimagakku” aamma ”tikikkuma takutissavara”.

Vittus Nielsenip taama oqartarneq allanngortariaqarsoraa, piniariat uppernarsaatitik akuersissutitillu pinngitsooratik nassartussaammatigik. Nassataqanngippatalu politiilersuutissavaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq