Pingasunngorneq ilanngullugu timmisartuussisoqassanngilaq
Tamatuma kinguneranik Nunatsinni timmisartuussineq tamarmi pingasunngorneq januaarip aqqaneq aappaat ilanngullugu unitsinneqarallarpoq.
Tamatuma kingorna timmisartuussinerit timmisartuutileqatigiiffiup ullormiit ullormut aalajangiiffigisassavai.
Timmisartuutileqatigiit nalunaarput, timmisartuussinissanut taamaatinneqartunut ilaasussaagaluit Air Greenlandimit toqqaannartumik imaluunniit angalatitseqatigiiffik bilitsinik pisiffigineqartoq aqqutigalugu attaveqarfigineqassasut.
Ilaasussaagaluit bilitsiminnik utertitsinissamut neqeroorfigineqassapput, taamaalillutik allatut angalanissaminnik periarfissarsiorniassammata, imaluunniit aaqqiagiinngissuteqarneq qaangiuppat nutaamik bilitsisisinnaaniassammata.
Bilitsiminnik utertitserusunngitsut inniminniisarfimmi allassimasuutigineqaannassapput, timmisartuussinerullu aallarteqqinneqarnerani ilaasinnaassallutik. Timmisartuussinerup aallarteqqinneqarnerani ilaasussat sivisunerpaamik utaqqisimasut siulliullutik ilaatinneqassapput.
Bilitsinik utertitsisinnaanissamut periarfissaq angalaniartunut tamanut januaarip 22-at ilanngullugu bilitseqartunut neqeroorutaavoq.
Tamatumunnga peqatigitillugu Air Greenlandip bilitsinik tuniniaaneq januaarip 29-at ilanngullugu unitsikkallarpaa.
Timmisartortitseqatigiiffik aqagumiit nittartakkamini www.airgreenland.gl -imi ullormut marloriarluni nutarterneqartartussamik paasissutissiisassaaq.