Assi: Paalu Møller/KNR

Qulaarpaa Pingasunik ukioqarluni atornerlugaasoq: Anniarnera suli eqqaamavara

Kinguaassiutitigut atornerlunneqarsimasut kingunerlutsitsisarnerat sakkortuupilussuuvoq, ajornartorsiullu annertooq Qulaarpaami ullumi sisamanngornermi maajip arfineq-aappaani immikkut sammissavarput. Tamatumunnga atatillugu arnamit kinaassutsiminik isertuusserusuttumit e-mailisivugut.

Ima oqaluttuarpoq:

Pingasuinnarnik ukioqarlunga qaatuppunga, taamani anniarninni qaatuppunga eqqaamavara, qaninga asserneqarsimavoq assannit qulinnilu angut qanigisara isigaara, assut anniarpunga qiavunga.

Atisalersulerami oqaluuppaanga oqaqunanga annersalerlungalu, oqaruma taamak annernartingisumik peqqissallunga. Taamani ukiukikkama naluara susoqartoq naluaralu sumut annernerlunga naakkut (ilukkut).

Taamani aataga toqoqqammerpoq. Isiginnaarpara karsip iluniiittoq (illerfik) kingornalu nunamut matuugaasoq, naluara toqu qanoq isumalik. Kisiannili suli atoqatigineqartarpunga, atoqateqatigineqareeraangama oqaluunneqartarpunga oqaruma aatagatut ilineqassasunga karsimut nunamullu sioqqanik asserneqassasunga, taamani ersingisaqaara taamaalineqarnissara.

Kiisa ukiukka amerlipput suli taanna angut atoqatigisarlugu, pisinnaajartorninni taanna angut sakkoqattalerpoq, savik allunaasarluunniit, atoqatigileraangaminga taakku qunusaarusiuttarpai, allunaasaq qungasinniitittarpaa savilluunniit.

Taamani inuusuttuaraanerup nalaani aappaqarniakujussinnaangilanga, angutit ersingaakka, taamaallaalli asanersaavakka qimmiutikka.

Taamaallungami naapitillattaartalerpunga, kisiannili angutaatikukka pinnguariuarpakka, imannak paasillungu, asanninneq pinnguaraara qimataajuarpungali.

Allamik naapitsigama taanna asanneqaaq, uangali paasisinnaanngilara qanoq asatigineraanga. Immerniakujuttalerpunga aapparalu isigisoq allalerisalerlunga, taassumali oqaluuttuarpaanga asagaminga qimakkunnarnanga. Uanga kamaattarpara illoqinngimmat allalerininni, tassami angutit naalliutsikkusuttaqaakka angummit naalliutsitaareernikuugama.

Taamaallungaasit fiisterlunga aappannut aaqquvunga. Aammanga isigisoq angutit isersimaqatikka tamaasa kunissoqqaarlugit anivunga, aapparmali soqutinginngilai. Soqutiginngimmagit aqqutaani kamassaaraluarpara, kamakkusunngilaq. Kiisa uanga kamalerpunga.  Uatsinnut iseratta aapparma kamappallaaqigama aalajangerpaanga suanngallunilu "ILLINUNA SUGAVIT TAAMAAGINNARPIT?

Nukillaarpunga manittortuinnanngorlungalu, nassuerniarnera annernaqaaq puigorneq-ajorpara anninniarsarinera oqaaseq atornerlungaasarlunga. Tassami suli taamani taassuma angutip atoqatigiuarpaanga, aapparma ingerlaannaq oqaluutilerpaanga anaanakkornukarta paasisariaqarpaat. Unnuaammat piumanngilanga aqaguani iterpunga soorlu oqilisimallunga. Timiga oqeqaaq, taamani saperunnaartutut misigaanga, kisiannili anaanakunnut iserama nukillaarpunga.

Taamani tupaqqaqaat. Nammineq oqarsinnaannginnama aapparma oqaassuppaanga. Ataataga kamaqaaq, allaat tanna toqukkiartorniarlugu nilliavoq, kisiannili eqqissimmat politiit saaffigaagut. Ataasinngornermi politeeqarfimmiippugut, suliaq ingerlalerpoq.

Taamani nassuerutiginnikkama 17-nik ukioqarpunga. Kisianni angerlarsimaffitsinnut kamakkiartortarpoq ersiortaqaangalu.

Aapparalu meerartaareerluta marlunnguanik ullaakkut iterpugut silatitsinni perpalussuaq. Sunaaffa taanna angussuaq taqqama qiarpaloqaaq taaguutiga taasarlugu, aammaateqqulluni toqunniaramitigut. Tassani annilaangaqaanga. Meerannguakka iluatigingaarakkit ilungersuummeruttorama qissasiinnarpunga, tassa inuunerput tamaanga killeqarsorilerlugu. Sivisuumik gangitinni nipilioriarluni nipaaruppallappoq. 

Politiinut tunniuparput, suliaq sukkanerulaamik ingerlalerpoq 2010-milu eqqartuusivimmi ajugaavunga, kisiannili ulloq manna tikillugu suli tusagaqanngilanga eqqartuusivimmut paasiniaajuaraluarpunga, akiinnartarpaanngali sianissallutik kisiannili sianinngisaannarput.

Massakkut nunannguara qimaqqammerpara taanna angut pissutaanerulluni, nunaqatigaarami. Takugaangakku assut aliasunneq, kamanneq mattunnerlu pigilertarpakka. Siumut ingerlarusullunga misilillugu nunannguara qimappara, kisiannili aamma imminut meeqqannullu ikilerpugut, angerlarseqaagummi.

Maaniilluta annilaanganata inuuneq nuanneraluaqaaq, nalunngilaralu nunannut angerlaruma annilaanganeq sillimajuarnerlu qamani pigiuassallugit, tassami toqunniarluta siorasaareeraatigut aammalu angerlarsimaffitsinnut toqukkiartoraluareeraatigut sillimajuartarnera qatsullugu illoqarfimmut allamut nuuppugut, naak nunannguara nuannarigaluaqalugu.

Aamma eqqartuussiviit aarriippallaarneri tupinnaqaat, tassami 2010-mi oktobarimi ajugaavunga. Kalerrinneqarpunga, kisiannili ullumikkut 2015 suli taanna angut illoqarfigisaminiippoq, sulilu taarsiivigineqarnissakka paasisaqarfiginagit. 

Aamma atuaruk - Pingasunik ukioqarlunga atornerlunneqarpunga

Aamma atuaruk - Tallimanik ukioqarlunga kinguaassiutitigut atornerlunneqaqqaarpunga

Aamma atuaruk Misigissutsitit oqaluuserikkit

Aamma atuaruk Inuunerup sinnerani ikiligaaneq

 

 

Isummersuutit


 

Pages