Assi: KNR/Arkiv

Qulaarpaa Inuunerup sinnerani ikiligaaneq

Meeqqat kinguaassiutimikkut atornerlunneqarsimasut inuunermi sinnerani nammakkerneqartarput. Ikinnguteqarpiarneq-ajorput, ilinnialernissartik ajornakusoortittarpaat amerlanertigullu imigassamik annertuumik atuisunngortarlutik.

Meeraq inersimasumit kannguttaatsuliorfigineqartoq kingorna inuuniarnikkut atugarliortunngortarpoq. Kinguaaassiutitigut atornerluisoqartarnera pillugu nalunaarusiami nutaami tamanna naqissuserneqarpoq.

Tamanna immini tupaallaatigisassaanngilaq, meeqqalli kannguttaatsuliorfigineqartut inuunerannut tamanna qanorpiaq sunniuteqartarnersoq siullerpaamik misissuiffigineqarpoq.

Paasissutissat

Nalunaarusiaq "Kalaallit Nunaanni Inuusuttut kinguaassiuutinut tunngasut kinguaassiuutitigullu innarliisarnerit qitiutinneqarlutik" SFI-mit - Det nationianale Forskningscenter for Velfærdimit suliarineqarpoq Naalakkersuisuniillu imissutigineqarsimalluni.

  • Misissuinermi inuusuttut 18-it 25-llu akornanni ukiullit misissuiffigineqarput.
  • Inuusuttut 400-t immersugassamik nassinneqarsimapput, taakkunanngalu 151-it akissuteqarsimapput.
  • Inuusuttut nunatsinnit tamaneersuupput, illoqarfimmiut nunaqarfimmiullu.
  • Taakku saniatigut inuusuttut 90-it sukumiinerusumik apersorneqarsimapput.

 

Kannguttaatsuliorfigiteqqinnissaq qaninnerulersartoq

Kannguttaatsuliorfigitinnerup kingunerisartagaasa tujorminarnerpaajorigunarpaat meeqqap allanut naleqqiullugu kannguttaatsuliorfigiteqqinnissaminut qaninnerulersarnera. Pingaartumillu niviarsiaqqat kannguttaatsuliorfigiteqqinnissamut qaninnerusarput.

Meeqqat pineqartut meeqqanut allanut naleqqiullugit inuuniarnikkut atorsaateqarneroreertuusarput. Nammineq naleqassutsimik misigisimanerat annikinnerusarpoq, inuunertik naammagisimarpiartanngilaat ikinnguteqarpiaratillu.

 

Ajortut naaffeqanngitsut

Inuusuttut kannguttaatsuliorfigineqarsimasut ilarpassui meeqqat atuarfiata kingorna unittoortarput. Peqatigisaminnut naleqqiullutik 10. klassip kingorna ilinniartitaanikkut ingerlaqqinngitsuukulanerupput, tamatumanilu niviarsiaqqat aamma eqqugaanerpaajusarput.

Tamatumunngalu ilanngullugu imigassamik atuinerusarput, tamannalu ilinniarnissamut periarfissaannut aamma sunniuteqartarluni. Kinguaassiutitigut atornerlunneqarsimaneq imigassamik annertuumik atuinermut pissutaarpiarnersoq imaluunniit imigassamik atuineq kannguttaatsuliorfigitinnissamut qaninnerulersitsinersoq misissuinermi erseqqissumik akissutissarsineqanngilaq. Inuusuttulli imigassamik annertuumik atuisut kinguaassiutitigut atornerlunneqarsinnaanerat eqqumaffigissallugu pingaaruteqartoq nalunaarusiami erseqqissaatigineqarpoq.

Pingajuattullu, qulaani taakkartorneqartunut atuumassuteqarsinnaasoq, tassaavoq arnat inuusuttut kinguaassiutimikkut atornerlugaasimasut allanut naleqqiullutik meerartaajaartarnerat.

Isummersuutit


 

Pages