Pingajoqqat ataqqinaammik ilaasortanngortinneqassapput
Partii Siumup aallarniisui pingajoqqanik taaneqartartut Jonathan Motzfeldt, Lars-Emil Johansen, Moses Olsen-ilu Siumumi ataqqinaamik ilaasortanngortinneqassasut, Siumup immikkut ataatsimeersuarnerani siulittaasup Hans Enoksen-ip ilanngullugu ippassaq saqqummiuppaa, ataatsimeersuaqataasut nuannaarutigeqisaanik.
Ataqqinaamilli ilaasortanngortitsinerit tamarmik immikkut ingerlanneqassapput.
Lars-Emil Johansen-ip ataqqinaamik ilaasortanngortinneqarnera ippassaq Qaqortumi Puilasumi ingerlanneqarpoq.
Tassani pissutaavoq Lars-Emil Johansen-ip anaanagigaluata Elisabeth Johansen-ip ukiunik 100-liinissaraluata Uummanami malunnartinniarneqarnissaanut Lars-Emil Johansen peqataajartorluni ullumi arfininngornermi aallartussaasimammat.
Moses Olsen napparsimanini pissutigalugu Qaqortumeeqataanngitsoq, oktobarip ulluisa aappaanni, Siumup ulluani ataqqinaaserneqassasoq ilisimatitsissutigineqarpoq.
Siumup Sulisartullu Højskoliata ukiunik 30-liinerat unnugu Qaqortup timersortarfiani nalliuttorsiutigineqalerpat Jonathan Motzfeldt ataqqinaamik ilaasortanngortinneqassaaq.