Pinerluuteqarsimasut attaveqaateqartarput

Pinerluuteqarsimasutut inissinneqarsimasup Poul Olsenip

Anstaltbetjentit attaviginiarneri ilungersunarneraarpai.

- Tassa inuttut sullinneqarneq maani anstaltimi amigaataagami, soorlu ukiup affaani pineqaatissinneqarama, kiisalu aniliivillunga ukiup affaanik pineqaatisinneqaqqinninni, ataasiaannarlungaluunniit kontaktpersonera oqaluunnikuunngilara. Qanoq inuttut ingerlariaqqinnissannut, aninissannullu qanoq siunertaqarnersunga, Poul Olsen oqarpoq. Taanna kisimi taamatut misigisimanngilaq. Pinerluuteqarsimasutut inissinneqarsimasup Agpârak Høegh-ip attaveqaqatigiinnermi amigaatini ima assersuusiorpaa.

- Immaqa ataatsimooqatigiinnerni anstaltbetjentinillu oqaloqateqartarneq, oqilisaaqatigiinneq immaqa tamakkuusinnaapput, kisianni tamarmik piffissaqanngillat, naluara sooq piffissaqannginnersut. Agpârak Høegh oqarpoq.

Pinerluuteqarsimasut Nuummi inissinneqartarfianni pisortaq, Peter Petersen, inissinneqarsimasunik attaveqartarneq pillugu nassuiaanermini erseqqissaavoq, pinerluuteqarsimasut inissinneqaraangata inunnik isumaginninnermi siunnersortimit oqaloqatigineqartartut. Taassumalu saniatigut attavigeqatigiittarneq minnerpaamik qaammammut ataasiarluni oqaloqatigiinnikkut ingerlanneqartartoq. Attaveqatigiinnerullu amigaateqarneranik oqariartorneq eqqunnginnerarpaa.

- Oqaloqatiginninneq taanna inuttut oqaloqatiginninneruvoq. Soorlu, qanoq ingerlavit massakkut? Susoqarpa? Taanna isersimasoq nassuiaateqassaaq, taava sulisoq arlaannik peqarsimaguni nassuiaateqassaaq. Tamakku tamarmik allattorneqartarput, taava journaliannut allanneqarlutik, Peter Petersen nassuiaavoq. Sulisunik amigaateqarneq pinerluuteqarsimasunik attaveqarnermut sunniuteqartoq, Pinerluuteqarsimasunut inissiisarfimmi pisortaq Peter Petersen oqarpoq.