Pinerlussimasunik naapitsisarneq
Tusarnaartartutta ilaata attaveqarfigaatigut tupigusuutigalugu, toqutsisimasoq allalu arneraluni pinngitsaaliisimasoq politiinit tugummigallagaasut eqqartuunneqarnissaminnillu utaqqisut, politiimit ingerlaqateqarnatik aneertut aqqusinermi naapikkamigit.
-Naapitsinera misigissutsikkut attueqaaq misigisimavungalu narrutsallunga, tusarnaartartutta ilaat kinaanerminik isertuusserusuttoq oqarpoq.
Taamatut aneersinnaatitaanermut akuersissutit malittarisassaat qanormitaava innersut paasiumallugit Nuummi Pineqaatissinneqarsimasut pisortaannut Ida Ichow –mut erseqqissaavigitippavut.
Pineqaatissinneqarsimasut isertitsivinniikkaluarunik, pineqaatissiivinniikkaluarunik Pinerluuteqarsimasunilluuniit Nakkutilliiviup ataani pineqaatissivinniikkaluarunik Kalaallit Nunaani Politimesterip maleruaqqusaanik tamarmik malinnittussaatitaapput, taaam aallarniivoq Ida Ichow.
Kalaallit Nunaani pineqaatissiivinni sumiluunniit inissineqarsimasut erseqqivissunik maleruaqqusanik atugassaqartitaapput, aneersinnaatitaalertarput pineqaatissinneqarsimanermik piffissaliussap minnerpaamik qulerarterutaa qaangiukkaangat.
Ida Ichow tassunga killitseriarlugu aperaarput uani pineqartut suli eqqartuunneqarnissaminnik utaqqisut aneersinnaatitaanerat qanoq malittarisassaqarnersoq, akivoq.
-Eqqartuunneqarnissaminnik utaqqisut tassaasarput politiinit tigummigallakkat. Tassalu takkua aneersinnaatitaanerannut tunngasut Kalaallit Nunaani politimesterip, tassa uani pineqartumi ima paasillugu najugaqarfimmi politiit, aaliangissavaat tigummigallagaasoq aneersinnaaatitaassanersoq. Akuerineqaruni tamatigorluinnaq politiimik ingerlaqateqartinneqassaaq, Ida Ickow oqarpoq nangipporlu.
- Politiimit ingerlaqateqanngitsoq, tassa kisimiilluni illoqarfimmi aneersinnaatitaasoq tassaasarpoq eqqartuunneqareersimalluni pineqaatissinneqareersimasoq Pinerluuteqarsimasunillu Isumaginnittoqarfiup ataani nakkutigineqartussanngorsimasoq, Ida Ichow –p oqaatsini taama naggaserpai.
