Pinerlunniat Sullualukkoortalernissaat aarlerigineqarpoq
Ottawami ilisimatusarfik ataqqisaasoq, the Conference Board, nalunaarusiamik nutaamik sapaatip akunnera una saqqummiussivoq, nalunaarusiami allassimavoq siunissami issittumi ulorianarsinnaasunut canadamiut mianersussasut.
Sullualukkut umiarsuarmik angalanissaq ajornannginnerulermat pinerlunnianit ornigineqarnerulissasoq ilimanarpoq, ajortumeeriniaasinnaapput, ikiaroornartunik tuniniaasartuusinnaapput imaluunniit allat Canadami inerteqqutinik eqqussiniat.
Immaqa aamma inuit akuersissummik peqaratik nunasisut Sullualukkoorlutik Canadaliartalernissaat ilimagineqartoq, nalunaarusiami allassimavoq.
Nalunaarusiamilu aamma oqaatigineqarpoq, maanna inunnik anngiortumik eqqussuisartut pinerluttullu allat Canadamut aqqut nutaaq taanna atortalereersimagunaraat.
Canada nunarujussuummat nuna tamakkerlugu nakkutigineqarnissaa Canadami sakkutuunit ajornartinneqarpoq.
Nalunaarusiami innersuusutigineqarpoq illoqarfiit inoqarfiillu issittumiittut pinerluttunut illersorneqassasut, tassani inuit eqqissillutik toqqissisimasumillu inuuniassammata.
Inuit issittumi najugallit isumannaatsumik inuuginnarnissaat anguniarlugu Canadami naalakkersuisut maanna qanoq iliuusissaminnik ujartueqqullugit nalunaarusiami aamma kaammattorneqarput.
