Pinerliiniat piliarineraat oqaatigisinnaanngilaat

PET aamma Københavnimi politiit tamaviaarlutik sulipput, maannamulli suli eqqisseqqissumik oqaatigisinnaanagu Hotel Jørgensenimi qaartitsineq pinerliinianut attuumassuteqarnersoq imaluunniit pinerluttulerinermut inatsimmik 'unioqqutitsinerinnaanersoq'.

PET-p pisortaa, Jakob Scharf tallimanngormat unnuap qeqqarluinnarunaraa tusagassiuutinut nalunaarummini taama allappoq.

Belgiami politiit arlallit qaartartumeerinermut suliamut atatillugu sulisinneqarput. Maannamulli suli paasisimanngilaat qaartartumeerisoq belgiamiuunersoq imaluunniit tamanna kinaassutsiminik salloqittaaneranut ilaaginnarnersoq. Taamaattorli Belgiamiut politiivi neriupput, nalunaaquttap akunnerini tulliuttuni 24-ni 48-niluunniit paasissutissanik nutaanik qallunaat politiivinut tunniussaqarsinnaassallutik, Lisa Pellens, Belgiami unnerluussisussaatitaasuneersoq Ritzaumut oqarpoq.

Københavnimi politiit tallimanngormat ualikkut nalunaaqutaq 13.29 kalerrinneqarput qaartartumeerisoqarneranik, takunnittullu oqaluttuarput angut kiinnamigut aagasattoq hotelimit qaartartumeerisoqaqqammernerata kingorna qimaguttoq.

Angut taanna suli kinaassuserneqanngilaq. Oqaatsit pingasut oqaaserai. Tyskisut, franskisut tuluttullu oqaluttarami.