Pineqaatissinneqarsimasut qulingiluat qinigaasinnaanngitsut

Qinigaasinnaanermik naliliisartut aalajangerpaat inuit taakku qulingiluat, ilagiit sinniisaannut apriilimi qinersisoqarmat qinigaagaluartut, pineqaatissinneqarsimasuummata, ilagiit sinniisaattut sulilersinnaanngitsut.

Taakku qulingiluat tassaapput Kapisilimmiu Ludvig Josefsen. Taanna Nuummi pisiniarfimmi Vinslotimi tillinniarsimasutut pineqaatissinneqarnikuuvoq.

Lukas Adolfsen, Alluitsup Paaneersoq, aningaasanik inunnut isumaginninnermi atugassanik peqquserluuteqarsimavoq, Judithe Brandt, Avannaata Kommuneani Qeqertarsuarmi qinigaasoq, aserorterisimasutut peqqarniisersimasutullu pineqaatissinninneqarsimavoq. Tiniteqilaami qinigaasoq, Otto Larsen, angallatip motoriinik marlunnik, kukkusumik nassiunneqarsimasunik, tuniniaasimavoq, tamannalu eqqartuussaassutigisimavaa.

Birthe Eliassen, Ilulissat pigisaanni Oqaatsuneersoq, Peter Amagtangneq, Illoqqortoormiuniit aamma Nukánguaq Qajoránguaq Nielsen, Qaanaap pigisaani Savissivimmeersoq, peqqarniisersimanitik pissutigalugit ilagiit sinniisaanni sulilersinnaanngitsutut qinigaasinnaanermik naliliisartunit nalilerneqarput.

Thomas Kristensen, Upernaviup pigisaani Nuussuarmeersoq, qimmiminik paarsinerlunnini pissutigalugu eqqartuussaasimasoq, kiisalu Símujôq Táunâjik, Tasiilap pigisaani Sermiligaameersoq, Great Greenlandimut peqquserlussimanini pissutigalugu pineqaatissinneqarsimasoq, ilagiinni sinniisunut qinigaasinnaanngitsutut qinigaasinnaanermik naliliisartunit nalilerneqarput.